ⵜⴻⵏⵏⴰ-ⴷ ⵜⵏⴻⵖⵍⴰⴼ ⵏ ⵜⵏⴻⵣⵣⵓⵜ ⵏ ⴷⴰⵅⴻⵍ ⴷ ⵓⵙⴻⵜⵜⵔⴻⴳ ⵏ ⵙⵙⵓⵇ ⵏ ⵜⵎⵓⵔⵜ, ⵎⴰⵙⵙⴰ ⴰⵎⴰⵍ ⵄⴰⴱⴷⴻⵍⵍⴰⵟⵉⴼ, ⴱⴻⵍⵍⵉ "ⴰⵙⵙⴻⴽⴼⴻⵍ ⵓⵔ ⴷ-ⵢⴻⵜⵜⴰⵡⵉ ⴰⵔⴰ ⵍⵎⴻⵔⴱⴰⵃ-ⵉⵙ ⵏ ⵜⴷⴰⵎⵙⴰ ⵙ ⵜⵉⴷⴻⵜⵜ ⴰⵏⴰⴳⴰⵔ ⵎⴰ ⵢⴻⵍⵍⴰ ⴷⴻⴳ ⵓⵏⴰⴳⵔⴰⵡ ⵉⴽⴻⵎⵍⴻⵏ ⵏ ⵜⵓⴼⴼⵖⴰ ⴷ ⵓⵙⵓⴳⴻⵏ", ⵜⴻⵙⵙⴻⴽⴻⵏ-ⴷ ⴷ ⴰⴽⴽⴻⵏ ⴷⴷⴰⴼⴰⵜ ⵏ ⵜⵏⴻⵖⵍⴰⴼⵜ-ⵉⵙ ⴷ ⵏⵓⵜⵏⵉ ⵉ ⴷ ⵍⵙⴰⵙ ⴳⴰⵔ ⵜⵓⴼⴼⵖⴰ, ⴰⵣⵓⵥⴻⵔ ⴷ ⵓⵙⴻⵎⵔⴻⵙ, ⵉⵡⴰⴽⴽⴻⵏ ⴰⴷ ⵢⴻⵔⴽⴻ ⵙⵙⵓⵇ ⴷ ⵓⵎⴻⵙⵡⴰ-ⵉⵙ.
ⵜⴻⵙⵙⴻⴼⵀⴻⵎ-ⴷ ⵎⴰⵙⵙⴰ ⵜⴰⵏⴻⵖⵍⴰⴼ ⴷⴻⴳ ⵢⵉⵡⴻⵜ ⵏ ⵜⵎⴻⵙⵍⴰⵢⵜ ⵉ ⴷ-ⵜⴻⴼⴽⴰ ⴷⴻⴳ ⵡⴰⵙⵙ ⵏ ⵓⵃⴻⴳⴳⵉ ⵖⴻⴼ "ⵓⴱⴻⴷⴷⴻⵍ ⵏ ⵍⵙⴻⵍⵄⴰ ⵏ ⴱⴻⵔⵔⴰ ⵙ ⵜⵉⵏ ⵏ ⵜⵎⵓⵔⵜ", ⵉ ⴷ-ⵢⴻⵍⵍⴰⵏ ⵙ ⵓⵙⴻⵏⵜⴻⵍ: "ⴰⵡⴻⵍⵍⴰⵀ ⵏ ⵓⵙⵙⴻⴽⴼⴻⵍ ⵉⵡⴰⴽⴽⴻⵏ ⵜⵓⴼⴼⵖⴰ ⵏ ⵜⵎⵓⵔⵜ ⴰⴷ ⵜⴻⵊⵀⴻⴷ ⴰⴷ ⵜⴻⵏⵏⴻⴼⵜⵉ", ⴱⴻⵍⵍⵉ ⴰⵎⴽⴰⵏ ⵏ ⵓⵃⵔⵉⵛ-ⴰⴳⵉ ⵎⴰⵔⵔⵉ ⴽⴰⵏ ⴷ ⴰⵙⴻⵜⵜⵔⴻⴳ ⵏ ⵙⵙⵓⵎⴰ, ⵎⴰⵛⴰ ⴷ ⴰⵡⴻⵍⵍⴰⵀ ⵏ ⵓⵙⵙⴻⴽⴼⴻⵍ ⵙ ⵡⴰⵍⵍⴰⵍⴻⵏ ⵏ ⵓⵙⵓⴷⴷⴻⵙ ⴷ ⵜⴷⵉⴳⵉⵜⴰⵍⵜ ⵉ ⵢⴻⵜⵜⴰⴽⴻⵏ ⵜⴰⴳⵏⵉⵜ ⵉⵡⴰⴽⴽⴻⵏ ⴰⴷ ⴷ-ⵏⵓⴼⴻⵖ ⵍⴻⵅⵚⴰⵙ ⴷⴻⴳ ⵙⵙⵓⵇ ⴷ ⵜⵎⵓⵖⵍⵉ ⵖⴻⵔ ⵡⴰⵢⴻⵏ ⵉ ⴷ-ⵜⵜⴻⵙⵙⵓⵜⵓⵔⴻⵏ ⵍⵖⴰⵛⵉ.
ⵜⴻⵙⵙⴻⴽⴻⵏ-ⴷ ⵎⴰⵙⵙⴰ ⴰⵎⴰⵍ ⵄⴰⴱⴷⴻⵍⵍⴰⵟⵉⴼ ⴱⴻⵍⵍⵉ "ⴰⵃⵔⵉⵛ-ⴰⴳⵉ ⵢⴻⴱⵏⴰ ⵖⴻⴼ ⵜⵎⵓⵖⵍⵉ ⵏ ⵜⴻⴽⵏⵉⵜ ⵉ ⵢⴻⵜⵜⴰⴽⴻⵏ ⴰⵣⴰⵍ ⵉ ⵙⵙⵓⵇ, ⴰⵎⴰ ⴷ ⵍⵙⴻⵍⵄⴰ ⵉ ⴷ-ⵢⴻⵜⴻⴼⴼⵖⴻⵏ ⵏⴻⵖ ⵜⵉⵏ ⵉ ⴷ-ⵜⵜⴻⵙⵙⵓⵜⵓⵔⴻⵏ, ⴷ ⵓⵙⵉⵙⵎⴻⵍ ⵏ ⵍⴻⵅⵚⴰⵙ ⴷⴻⴳ ⵜⵓⴼⴼⵖⴰ ⵍⴰⴷⵖⴰ ⵏ ⵍⵙⴻⵍⵄⴰ ⵉ ⵜⵜⴻⵇⵇⵓⴷⴻⵏ ⵎⴻⴷⴷⴻⵏ ⴰⵟⴰⵙ, ⴷ ⵓⵙⴻⵎⵔⴻⵙ ⵏ ⵜⴻⵣⵎⴻⵔⵜ ⵏ ⵓⵃⵔⴰⵣ ⴷ ⵓⵣⴻⵟⵟⴰ ⵏ ⵓⵣⵓⵥⴻⵔ."
ⵜⴻⵏⵏⴰ-ⴷ ⴷ ⴰⴽⴽⴻⵏ "ⵜⵉⴳⴰⵡⵜ ⵏ ⵓⵙⵉⴹⴻⵏ ⵏ ⵜⴷⴰⵎⵙⴰ ⵉ ⵢⴻⵅⴷⴻⵎ ⵓⵃⵔⵉⵛ-ⴰⴳⵉ ⴷⴻⴳ ⵜⴰⵣⵡⴰⵔⴰ ⵏ ⵓⵙⴻⴳⴳⴰⵙ-ⴰⴳⵉ, ⴷ ⴰⵍⵍⴰⵍ ⵏ ⵜⵙⵜⵔⴰⵜⴻⴳⵉⵜ ⵉⵡⴰⴽⴽⴻⵏ ⴰⴷ ⵏⵥⴻⵔ ⵜⴻⵣⵎⴻⵔⵜ ⵏ ⵜⵓⴼⴼⵖⴰ ⵏ ⵜⵎⵓⵔⵜ ⴷ ⵡⴰⵢⴻⵏ ⵓⵔ ⵏⴻⵜⵜⵡⴰⵅⴷⴻⵎ ⴰⵔⴰ, ⵉⵡⴰⴽⴽⴻⵏ ⴰⴷ ⵏⵙⴻⴱⴷⴻⴷ ⵢⵉⵡⴻⵜ ⵏ ⵜⴳⴰⴼⴰ ⵏ ⵢⵉⵙⴰⵍⵍⴻⵏ ⵉⵚⴻⵃⵃⴰⵏ ⵉ ⵓⵡⴻⵍⵍⴰⵀ ⵏ ⵓⵙⵙⴻⴽⴼⴻⵍ ⵖⴻⵔ ⵢⵉⵀⵔⵉⵛⴻⵏ ⵉ ⴷ-ⵢⴻⵜⵜⴰⵡⵉⵏ ⵍⵎⴻⵔⴱⴰⵃ ⴷ ⵓⵙⴻⵏⵇⴻⵙ ⵏ ⵍⵙⴻⵍⵄⴰ ⵏ ⴱⴻⵔⵔⴰ."
ⵜⴻⵙⵙⴻⴽⴻⵏ-ⴷ ⴷ ⴰⴽⴽⴻⵏ ⵢⵉⵙⴰⵍⵍⴻⵏ ⵉⵎⴰⵢⵏⵓⵜⴻⵏ ⵏ ⵜⴷⴰⵎⵙⴰ ⵏ ⵜⵎⵓⵔⵜ ⴷ ⴰⴽⴽⴻⵏ ⴳⴰⵔ ⵓⵙⴻⴳⴳⴰⵙ 2020 ⴷ 2025 ⵢⴻⵍⵍⴰ-ⴷ ⵓⵏⵏⴻⵔⵏⵉ ⴰⵎⴻⵇⵇⵔⴰⵏ, ⵉⵎⵉ ⴷ-ⵍⵍⴰⵏⵜ ⵎⵔⴰⵡ ⴷ ⵙⴷⵉⵙ ⵏ ⵡⴰⴳⵉⵎ (36.000) ⵏ ⵜⴽⴻⴱⴱⴰⵏⵢⵉⵏ ⵜⵉⵎⴰⵢⵏⵓⵜⵉⵏ, ⵍⴰⴷⵖⴰ ⴷⴻⴳ ⵓⵃⵔⵉⵛ ⵏ ⵍⴻⴱⵏⵉ, ⵜⵉⴼⴻⵣⵣⴰ ⵏ ⵜⵔⵉⵙⵉⵜⵉ, ⴷ ⴷⴷⵓⵣⴰⵏ ⵏ ⵓⵅⴰⵎ, ⵜⵉⵔⵎⴰⴷ ⵏ ⵜⵓⴼⴼⵖⴰ ⵏ ⵍⵎⴰⴽⵍⴰ ⴷ ⵜⵉⵔⵎⴰⴷ ⵏ ⴷⴷⵡⴰ.
ⵜⴻⵏⵏⴰ-ⴷ ⵜⴰⵏⴻⵖⵍⴰⴼ ⴱⴻⵍⵍⵉ ⴰⵢⴰ ⴷ ⴰⵢⴻⵏ ⵉ ⴷ-ⵢⴻⵍⵍⴰⵏ ⵙ ⵍⵎⴻⵏⴷⴰⴷ ⵏ ⵢⵉⵙⵓⴹⴰⴼ ⵏ ⵍⵎⴰⵍ ⵉ ⴷ-ⵢⴻⵜⴻⴼⴼⵖⴻⵏ, ⵉ ⵢⴻⵔⵔⴰⵏ ⵜⴰⴳⵏⵉⵜ ⵏ ⵓⵙⵓⵔⴻⴼ ⵏ ⵜⴻⴱⵣⴻⵔⵜ ⴷ ⵍⴳⵓⵎⵔⵓⴽ, ⴷ ⵓⵙⴻⵏⵏⴻⵔⵏⵉ ⵏ ⵓⵃⵔⵉⵛ ⵏ ⵜⵓⴼⴼⵖⴰ ⴷ ⵜⴽⴻⴱⴱⴰⵏⵢⵉⵏ ⵏ "ⵚⵜⴰⵔⵜⵓⵒ", ⴷ ⵓⵙⵏⴻⵔⵏⵉ ⵏ ⵓⵏⴻⴽⵛⵓⵎ ⵏ ⵜⵎⵓⵔⵜ ⴷⴻⴳ ⵓⵙⵙⴻⴽⴼⴻⵍ.
ⴷⴻⴳ ⵡⴰⵢⴻⵏ ⵢⴻⵄⵏⴰⵏ ⴰⵙⵓⴷⴷⴻⵙ ⵏ ⵙⵙⵓⵇ, ⵜⴻⵙⵙⴻⴽⴻⵏ-ⴷ ⴷ ⴰⴽⴽⴻⵏ ⴰⵡⴻⵍⵍⴰⵀ ⵏ ⵓⵙⵙⴻⴽⴼⴻⵍ ⵉⵍⴰⵇ ⴰⴷ ⴷ-ⵢⴰⵙ ⵙ ⵓⵣⴻⵟⵟⴰ ⴰⵎⴰⵢⵏⵓ ⵏ ⵓⵣⵓⵥⴻⵔ ⴷ ⵓⵙⴻⵍⵃⵓ ⵏ ⵙⵙⵓⵇ, ⴷ ⵓⵛⴻⴳⴳⴻⵄ ⵏ ⵓⵙⵙⴻⴽⴼⴻⵍ ⴷⴻⴳ ⵜⴼⴻⵏⵣⵉⵢⵉⵏ ⵜⵉⵅⴰⵜⵉⵔⵉⵏ ⴷ ⵓⵙⴻⵔⵔⴻⵃ ⵏ ⵓⵏⴻⵔⵎⵉⵙ ⴳⴰⵔ ⵢⵉⵎⵙⴻⵍⵍⴽⴻⵏ ⴷ ⵡⵉⴷ ⵢⴻⵣⵣⵓⵣⵓⵔⴻⵏ ⵍⵙⴻⵍⵄⴰ ⵙⵔⵉⴷ, ⵉⵡⴰⴽⴽⴻⵏ ⴰⴷ ⴷ-ⵏⵙⴻⵏⵇⴻⵙ ⵢⵉⵎⴻⵙⵙⵓⴷⴻⵏ ⵓⵔ ⵏⴻⵜⵜⵡⴰⵅⴷⴻⵎ ⵙ ⵍⵇⴰⵏⵓⵏ.
ⴷⴻⴳ ⵜⴰⴳⴳⴰⵔⴰ, ⵜⴻⵙⵙⴻⴽⴻⵏ-ⴷ ⴷ ⴰⴽⴽⴻⵏ ⴰⴷ ⴷ-ⵢⴻⵔⵔ ⴷⵉⵎⴰ ⵡⴰⵍⵍⴰⵍⴻⵏ ⵏ ⵜⴷⵉⴳⵉⵜⴰⵍⵜ ⵉⵡⴰⴽⴽⴻⵏ ⴰⴷ ⵙⵙⴰⵍⴰⵢⴻⵏ ⵙ ⵙⵔⵉⴷ ⴷ ⵍⵙⴻⵍⵄⴰ ⵏ ⵍⵎⴰⴽⵍⴰ ⵜⴰⵎⴻⵇⵇⵔⴰⵏⵜ ⴷ ⵓⴹⵎⴰⵏ ⵏ ⵓⵔⴽⴰⴷ ⵏ ⵙⵙⵓⵎⴰ, ⵉⵡⴰⴽⴽⴻⵏ ⴰⴷ ⴷ-ⵃⵓⴷⴷⴻⵏ ⵜⴰⵣⵎⴻⵔⵜ ⵏ ⵓⵖⵉⵔ ⵏ ⵓⵖⴰⵍⴰⴷ.
ⴰⵔⵏⵓ ⵖⴻⵔ
