ⵉⵙⴷⴻⴷ ⵓⵙⵍⵡⴰⵢ ⵏ ⵜⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴻⴷⵊⵉⴷ ⵜⴻⴱⴱⵓⵏ, ⴰⵙⵙ ⴰ ⵏ ⵓⵔⴰⵎ ⴷⴻⴳ ⴷⵣⴰⵢⴻⵔ ⵜⴰⵎⴰⵏⴻⵖⵜ, ⵍⵊⴻⵀⴷ ⵏ ⵜⵎⵓⵔⵜ ⵉ ⵓⴽⴻⵎⵎⴻⵍ ⵏ ⵡⴰⴱⵔⵉⴷ ⵏ ⵢⵉⵙⴻⴳⴳⵉⵎⴻⵏ ⴷ ⵓⵙⵎⵉⵔⴻⴷ ⵏ ⵢⵉⵙⴻⵏⴼⴰⵔⴻⵏ ⵏ ⵜⵏⴻⴼⵍⵉⵜ, ⵢⴻⵔⵏⴰ ⵢⴻⵙⴷⴻⴷ ⴱⴻⵍⵍⵉ ⴷⵣⴰⵢⴻⵔ ⵜⴻⵣⵎⴻⵔ ⴰⴷ ⵜⴻⴳⴳ ⴰⵟⴰⵙ ⵏ ⵡⴰⵢⴻⵏ ⵢⴻⵍⵀⴰⵏ ⴷⴻⴳ ⴽⵓⵍ ⴰⵃⵔⵉⵛ, ⵡⴰⵢⵉ ⵓⵔ ⵢⴻⵣⵎⵉⵔ ⴰⴷ ⵜ-ⵢⴻⵏⴽⴻⵔ ⵖⵉⵔ ⵡⵉⵏ ⵢⴻⴽⵔⴻⵏ ⵍⴼⴰⴹⵍ.
ⴷⴻⴳ ⵢⵉⵡⴻⵏ ⵢⵉⵏⴰⵡ ⵉ ⵡⴻⴳⴷⵓⴷ ⴷⴰⵜ ⵓⴱⴻⵔⵍⴰⵎⴰⵏ ⵙ ⵢⵉⵅⴼⴰⵡⴻⵏ-ⵉⵙ ⵙⵉⵏ ⴷⴻⴳ ⵓⵅⴰⵎ ⵏ ⵜⵎⵓⵔⴰ (ⵇⴰⵚⵔ ⵍⵓⵎⴰⵎ), ⵢⴻⵏⵏⴰ ⵓⵙⵍⵡⴰⵢ ⵏ ⵜⴳⴷⵓⴷⴰ ⴱⴻⵍⵍⵉ "ⵉⵙⴻⴳⴳⵉⵎⴻⵏ ⴷ ⴰⴱⵔⵉⴷ ⵢⴻⵜⵜⴽⴻⵎⵎⵉⵍⴻⵏ ⵉ ⵓⵙⴻⴷⴷⴻⵜ ⵏ ⵍⵃⴻⴽⵎ ⵉ ⵡⴻⴳⴷⵓⴷ ⵢⴻⵔⵏⴰ ⵙ ⵡⴻⴳⴷⵓⴷ", ⵢⴻⵔⵏⴰ ⵢⴻⵏⵏⴰ-ⴷ: "ⴰⴷ ⵏⴻⴽⴽⴻⵎⵎⴻⵍ ⴷⴻⴳ ⵓⵙⵎⵉⵔⴻⴷ ⵏ ⵢⵉⵙⴻⵏⴼⴰⵔⴻⵏ ⵏ ⵜⵏⴻⴼⵍⵉⵜ ⵜⴰⴷⴰⵡⵔⴰⵏⵜ".
ⵢⴻⵛⴽⴻⵔ ⴷⴰⵖⴻⵏ ⵓⵙⵍⵡⴰⵢ ⵍⵊⴻⵀⴷ ⵏ ⵓⴱⴻⵔⵍⴰⵎⴰⵏ ⵉ ⵢⴻⵣⵎⴻⵔⵏ "ⴰⴷ ⵢⴻⵙⵙⴻⴷⴷⴻⵜ ⵍⵃⴻⵇⵇ ⵏ ⵜⵏⴻⵣⵔⴰⴼⵜ, ⵙ ⵓⵙⴻⴷⴷⴻⵜ ⵏ ⵢⵉⵙⴻⵏⴼⴰⵔⴻⵏ ⵏ ⵍⵇⴰⵏⵓⵏ, ⴰⵎ ⵍⵇⴰⵏⵓⵏ ⵏ ⵜⵎⵓⵔⵜ (ⵍⵊⵉⵏⵙⵉⵢⴰ) ⴷ ⵓⵙⵙⴻⴳⴳⴻⴷ ⵏ ⵡⴰⵢⴻⵏ ⵢⴻⴳⴳⴰ ⵓⵙⴽⴻⵔⵛⴻⴼ". ⵢⴻⵏⵏⴰ-ⴷ ⴱⴻⵍⵍⵉ ⴰⴷ ⵢⴻⵔⵔ ⴰⵔⵔⴰⵣ ⵉ ⵡⴰⵢⴻⵏ ⴰⴽⴽ ⴰⴷ ⵓⵜⵜⵔⴻⵏ ⵢⵉⴽⴰⴱⴰⵔⴻⵏ ⵉⴱⵓⵍⵉⵜⵉⴽⵉⵢⴻⵏ ⴷⴻⴳ ⵓⴷⵉⵡⴻⵏ. ⵢⴻⵙⴷⴻⴷ ⴷⴰⵖⴻⵏ ⴱⴻⵍⵍⵉ "ⵜⴰⵖⴷⴻⵎⵜ ⴰⴷ ⵜⴻⴱⴷⴻⴷ ⴷⴰⵜ ⵏ ⴽⵓⵍ ⵜⵓⵎⴰⵏⵜ ⵏ ⵍⴼⴻⵙⴰⴷ ⵢⴻⵔⵏⴰ ⴰⴷ ⵜⵃⵓⴷⴷⵓ ⵉⵎⴻⵙⵍⴰⵢⴻⵏ ⵉⵃⴻⵇⵇⵉⵢⴻⵏ".
ⵖⴻⴼ ⵜⴷⴰⵎⵙⴰ, ⵢⴻⴱⴷⴻⵔ-ⴷ ⵓⵙⵍⵡⴰⵢ ⴰⵏⴻⵔⵏⵉ ⵏ ⵓⵙⴻⵜⵜⴻⵢ (ⵍⵉⵙⵜⵉⵜⵎⴰⵔ), ⵢⴻⵏⵏⴰ-ⴷ ⴱⴻⵍⵍⵉ ⵍⵍⴰⵏ 309 ⵏ ⵢⵉⵙⴻⵏⴼⴰⵔⴻⵏ ⵏ ⵡⵉⴷ ⵉ ⴷ-ⵢⵓⵙⴰⵏ ⵙⵉ ⴱⴻⵔⵔⴰ, ⵡⴰⵢⵉ ⴷ ⴰⵔⵔⴰⵣ ⵉ ⵡⵉⴷ ⵢⴻⵇⵇⴰⵔⴻⵏ ⴱⴻⵍⵍⵉ ⴷⵣⴰⵢⴻⵔ ⵜⴻⵍⵍⴰ ⵡⴰⵃⴷ-ⴻⵙ. ⵢⴻⵏⵏⴰ-ⴷ ⴱⴻⵍⵍⵉ ⵜⴰⴷⴰⵎⵙⴰ-ⵏⵏⴻⵖ ⵜⴻⵍⵍⴰ ⴷⴻⴳ ⵢⵉⵡⴻⵏ ⵍⵃⴰⵍ ⵢⴻⵍⵀⴰⵏ ⵢⴻⵔⵏⴰ ⵡⴰⵢⵉ ⴷ ⵍⵛⴻⵖⵍ ⵏ ⴽⵓⵍ ⵉⵎⴻⵙⵍⴰⵢⴻⵏ ⴷ ⵢⵉⵇⴻⴷⴷⴰⵛⴻⵏ ⵏ ⵜⵎⵓⵔⵜ.
ⵢⴻⴱⴷⴻⵔ-ⴷ ⴷⴰⵖⴻⵏ ⵡⴰⵢⴻⵏ ⵜⴻⴳⴳⴰ ⴷⵣⴰⵢⴻⵔ ⴷⴻⴳ ⵡⴰⵙⵙⴰⵢ ⵏ ⵡⵓⵣⵣⴰⵍ (ⵍⵛⴻⵎⵉⵏ ⴷⴻ ⴼⴻⵔ), ⵢⴻⵏⵏⴰ-ⴷ ⴱⴻⵍⵍⵉ ⴰⴷⵣⴰⵢⵔⵉ ⵢⴻⵣⵎⴻⵔ ⴰⴷ ⵢⴻⴳⴳ ⵍⵎⵓⵄⵊⵉⵣⴰⵜ. ⵢⴻⵏⵏⴰ-ⴷ ⴱⴻⵍⵍⵉ ⵍⴼⴰⵔⴻⵙ ⴰⵖⴻⵍⵏⴰⵡ ⵢⵓⵖⴰⵍ ⵢⴻⵊⵊⴻⵀⴻⴷ, ⵢⴻⵔⵏⴰ ⴰⵎⵓⵔ ⵏ ⵜⵎⴻⴳⵔⵉ (ⵍⵉⵏⴷⵓⵙⵜⵔⵉ) ⵢⵓⵖⴰⵍ ⴰⵔ 10 ⵏ ⵍⵎⵢⴰ ⴷⴻⴳ ⵍⴼⴰⵔⴻⵙ ⴰⵖⴻⵍⵏⴰⵡ ⵓⴼⵔⵉⴷ. ⵢⴻⵛⴽⴻⵔ ⴷⴰⵖⴻⵏ ⵉⵍⵎⴻⵣⵢⴻⵏ ⵏ ⵜⵎⵓⵔⵙⴰⵢⵉⵏ ⵏ ⵢⵉⵎⴻⵣⵡⵓⵔⴰ (ⵙⵜⴰⵔⵜⵓⴱⵙ) ⵉ ⵢⴻⵡⴹⴻⵏ 13 ⵏ ⵢⴰⴼⵏⴻⵏ (13.000).
ⵖⴻⴼ ⵜⴼⴻⵍⵍⴰⵃⵜ, ⵢⴻⵏⵏⴰ ⵓⵙⵍⵡⴰⵢ ⴱⴻⵍⵍⵉ ⵢⴻⵍⵍⴰ ⵢⵉⵡⴻⵏ ⵓⵏⴻⵔⵏⵉ ⵎⴻⵇⵇⵔⴻⵏ, ⵢⴻⵔⵏⴰ ⵍⵍⴰⵏ 15 ⵏ ⵢⴰⴼⵏⴻⵏ ⵏ ⵜⵎⵓⵔⵙⴰⵢⵉⵏ ⵏ ⵜⴼⴻⵍⵍⴰⵃⵜ, ⵎⴰⵛⴰ ⵢⴻⵏⵏⴰ-ⴷ ⴱⴻⵍⵍⵉ ⵢⴻⵍⵍⴰ ⵢⵉⵡⴻⵏ ⵓⵅⴻⵙⵙⴰⵔ ⴷⴻⴳ ⵍⴼⴰⵔⴻⵙ ⵏ ⵓⴽⵙⵓⵎ, ⵢⴻⵔⵏⴰ ⵢⴻⵙⵙⵓⵜⴻⵔ ⵙⵉ ⵡⵉⴷ ⵏ ⵓⵃⵔⵉⵛ-ⴰ ⴰⴷ ⵃⴰⵔⴱⴻⵏ ⵖⴻⴼ ⵜⵎⵓⵔⵜ-ⵏⵏⴻⵙⵏ.
ⴷⴻⴳ ⵓⵃⵔⵉⵛ ⵏ ⵜⴰⴷⴰⵡⵙⴰ (ⵚⵚⴻⵃⴰ), ⵢⴻⵛⴽⴻⵔ ⴰⵏⴻⵔⵏⵉ ⵏ ⵜⵓⴷⴻⵔⵜ ⵏ ⵢⵉⵎⴷⴰⵏⴻⵏ ⴷ ⵓⵇⵔⴰⵄ ⵏ ⵡⴰⵟⵟⴰⵏⴻⵏ. ⵢⴻⵔⵔⴰ-ⴷ ⴷⴰⵖⴻⵏ ⴰⵔⵔⴰⵣ ⵉ ⵡⵉⴷ ⵢⴻⴱⵖⴰⵏ ⴰⴷ ⵙⵙⴻⵃⵙⵔⴻⵏ ⵡⴰⵢⴻⵏ ⵢⴻⵜⵜⵡⴰⵅⴻⴷⵎⴻⵏ, ⵢⴻⵏⵏⴰ-ⴷ ⴱⴻⵍⵍⵉ "ⴰⵎⴹⴰⵏ-ⵏⵏⴻⵖ ⴷ ⵜⵉⴷⴻⵜ". ⵢⴻⵙⴷⴻⴷ ⴱⴻⵍⵍⵉ ⵓⵔ ⵏⴻⵜⵜⴰⵊⵊⴰ ⴰⵎⴻⵣⴷⴰⵖ ⴰⵎⴻⴳⵏⵓ, ⵢⴻⵔⵏⴰ ⴰⴷ ⵏⴻⴽⴽⴻⵎⵎⴻⵍ ⴰ ⵏⴻⵔⴼⴻⴷ ⵜⵉⵖⴻⵔⴰⴷ (ⵍⴻⵛⵀⴰⵔⵉ) ⴷ ⵓⵃⵓⴷⴷⵓ ⵏ ⵍⵊⴻⵀⴷ ⵏ ⵓⵛⵛⵉ.
ⵖⴻⴼ ⵜⵣⴻⴷⴷⵖⵜ, ⵢⴻⵏⵏⴰ-ⴷ ⴱⴻⵍⵍⵉ ⵢⴻⵜⵜⵡⴰⵅⴷⴻⵎ 1,7 ⵏ ⵎⴻⵍⵢⵓⵏ ⵏ ⵜⵣⴻⴷⴷⵖⵉⵡⵉⵏ ⵙⵉ ⵜⴰⵍⵍⵉⵜ-ⵉⵙ ⵜⴰⵎⴻⵣⵡⴰⵔⵓⵜ. ⵢⴻⵔⵏⴰ ⵢⴻⴼⴽⴰ ⵍⴰⵎⴻⵔ ⵉ ⵓⵙⴱⴻⴷⴷⵉ ⵏ ⵙⵏⴰⵜ ⵏ ⵜⵎⴰⵔⵉⵡⵉⵏ ⵏ ⵡⴰⵎⴰⵏ ⴷⴻⴳ ⵜⵉⵏⴷⵓﻓ ⴷ ⵜⵎⴰⵏⵖⴰⵙⴻⵜ.
ⴷⴻⴳ ⵜⴱⵓⵍⵉⵜⵉⴽⵜ ⵜⴰⴳⵔⴰⵖⵍⴰⵏⵜ, ⵢⴻⵙⴷⴻⴷ ⴰⴱⴻⴷⴷⵉ ⵏ ⴷⵣⴰⵢⴻⵔ ⴷⴷⵓ ⴼⴰⵍⴻⵙⵜⵉⵏ. ⵢⴻⵏⵏⴰ-ⴷ ⴱⴻⵍⵍⵉ ⴷⵣⴰⵢⴻⵔ ⵓⵔ ⵜⴻⵜⵜⴰⵡⵉ ⵖⵉⵔ ⵍⵅⵉⵔ ⵉ ⵍⵊⵉⵔⴰⵏ-ⵉⵙ. ⵖⴻⴼ ⵜⵓⵏⴻⵙ, ⵢⴻⵏⵏⴰ-ⴷ ⴱⴻⵍⵍⵉ ⵍⴰⵎⴰⵏ ⵏ ⴷⵣⴰⵢⴻⵔ ⴷ ⵡⵉⵏ ⵏ ⵜⵓⵏⴻⵙ ⴷ ⵢⵉⵡⴻⵏ, ⵢⴻⵔⵏⴰ ⵡⵉⴷ ⵢⴻⴱⵖⴰⵏ ⴰⴷ ⵙⵙⴻⵃⵙⵔⴻⵏ ⵜⴰⴳⵎⴰⵜ ⴳⴰⵔ-ⴰⵖ ⵓⵔ ⵣⵎⵉⵔⴻⵏ ⴰⴷ ⵜ-ⴳⴳⴻⵏ. ⵢⴻⵏⵏⴰ-ⴷ ⴱⴻⵍⵍⵉ ⴰⵙⵍⵡⴰⵢ ⵇⴰⵢⵙ ⵙⵄⵉⵢⴻⴷ ⴷ ⴰⵎⴻⴷⴷⴰⴽⴻⵍ, ⵢⴻⵔⵏⴰ ⵡⵉⵏ ⵢⴻⵏⵏⴰⵍⴻⵏ ⵜⵓⵏⴻⵙ ⵢⴻⵏⵏⴰⵍ ⴷⵣⴰⵢⴻⵔ.
ⴰⵔⵏⵓ ⵖⴻⵔ
