ⵙⴻⴳ ⵎⵉ ⵉ ⵢⴻⵟⵟⴻⴼ ⵎⴰⵙⵙ ⵄⴱⴷⴻⵍⵎⴰⴵⵉⴷ ⵜⴱⴱⵓⵏ ⵍⴻⵃⴽⵓⵎ ⵏ ⵜⵎⵓⵔⵜ ⴷⴻⴳ 2020, ⵢⴻⵔⵔⴰ ⴰⴼⴰⵢⵍⵓ ⴰⵎⴻⵜⵜⵉ ⴷ ⴰⵎⴻⵣⵡⴰⵔⵓ ⴷⴻⴳ ⵡⴰⵀⵉⵍ-ⵉⵙ. ⵢⴻⴷⴷⴻⵎ ⵜⵉⵖⵜⴰⵙⵉⵏ ⵜⵉⵎⴰⵣⵔⴰⵢⵉⵏ ⴷ ⵢⵉⵙⴻⵏⴼⴰⵔⴻⵏ ⵍⵇⴰⵢⴻⵏ ⵉ ⵢⴻⴱⴷⴷⵍⴻⵏ ⵛⵡⵉⵟ ⵛⵡⵉⵟ ⵜⴰⵖⴰⴹⵜ ⵏ ⴷⴷⴻⵅⴻⵍ ⴰⵖⴻⵍⵏⴰⵡ, ⵙ ⵓⵙⴰⵍⵉ ⵏ ⵢⵉⴳⵔⵉⵙⴻⵏ ⵍⴰⵏⵜⵔⵉⵜ ⵏ ⵢⵉⵎⵖⴰⵔⴻⵏ , ⴷ ⵓⵙⵏⵓⵍⴼⵓ ⵏ ⵡⴰⵍⵍⴰⵍⴻⵏ ⵉⵎⴰⵢⵏⵓⵜⴻⵏ ⵏ ⴷⴷⴻⵎ ⴰⵎⴻⵜⵜⵉ, ⴰⵎ ⵜⴻⴷⵔⵉⵎⵜ ⵏ ⵜⵖⴰⵍⴰ , ⵔⵏⵓ ⵖⴻⵔ-ⵙ ⵜⵉⵊⵎⵉⵍⵉⵏ ⵜⵉⵎⴻⵇⵔⴰⵏⵉⵏ ⵉ ⵓⵃⵔⴰⵣ ⵏ ⵜⵣⴻⵎⵎⴻⵔⵜ ⵏ ⵜⵉⵖⵉⵏ, ⴷⴻⴳ ⵢⵉⵡⴻⵜ ⵏ ⵜⴻⴳⵏⵉⵜ ⵜⴰⴷⴰⵎⵙⴰⵏⵜ ⵜⴰⵎⴰⴹⵍⴰⵏⵜ ⵉⵡⴻⵄⵔⴻⵏ ⵉ ⴷ-ⵢⵡⵡⵉⵏ ⵍⴻⵔⵢⵓⵢ ⵏ ⵜⴻⵣⵎⴻⵔⵜ ⴷ ⴷⴷⴰⵎⴻⵏ ⴰⵊⵢⵓⴱⵓⵍⵉⵜⵉⴽ.
ⵜⵉⵖⵜⴰⵙⵉⵏ-ⴰ ⵙⵛⴰⵏⵜ ⵜⴰⵎⵓⵖⵍⵉ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉ ⵢⴻⵔⵔⴰⵏ ⴰⵎⵓⵖⵔⵉⵙ ⴷⴻⴳ ⵡⵓⵍ ⵏ ⵜⵙⴻⵔⵜⵉⵢⵉⵏ ⵜⵉⵎⴰⵜⵓⵜⵉⵏ, ⵙ ⵓⵙⴻⴳⴳⴻⵎ ⵏ ⴷⴰⵅⴻⵍ, ⴰⵙⴻⵏⵇⴻⵙ ⵏ ⵜⴻⵡⵡⵙⵉⵡⵉⵏ, ⴰⴷⴻⵍⵍⴻⵍ ⵏ ⵢⵉⴼⴻⵍⵍⴰⵃⴻⵏ ⴷ ⵢⵉⵎⴼⴰⵔⴰⵙⴻⵏ, ⴷ ⵓⵙⴻⴵⵀⴻⴷ ⵏ ⵓⵃⵔⴰⵣ ⴰⵎⴻⵜⵜⵉ. ⴰⵢ-ⴰ ⵢⴰⴽⴽ ⵉⵡⴰⴽⴽⴻⵏ ⴰⴷ ⵢⴻⵔⵙ ⵍⴻⵇⴷⴻⵔ ⵏ ⵜⵖⴷⴻⵎⵜ ⵜⴰⵎⴻⵜⵜⵉⵜ, ⴰⴷ ⵢⴻⵜⵡⴰⴹⵎⴻⵏ ⵍⴰⵎⴰⵏ ⴰⵖⴻⵔⵙⵉⵡ ⴰⵖⴻⵍⵏⴰⵡ, ⵓ ⴰⴷ ⵢⴻⵜⵙⴻⴷⴷⵓ ⵍⵃⴰⵍ ⵏ ⵜⵓⴷⴻⵔⵜ ⵉ ⵢⴰⴽⴽ ⵉⵃⵔⵉⵛⴻⵏ ⵏ ⵜⵎⴻⵜⵜⵉ.
ⴰⵙⵓⵔⵉⴼ ⴰⵎⴻⵣⵡⴰⵔⵓ ⴷⴻⴳ ⵓⴱⵔⵉⴷ-ⴰ ⴷ ⴰⵙⴰⵍⵉ ⵏ ⵓⵖⵔⵓⴷ ⴰⵖⴻⵍⵏⴰⵡ ⴰⴷⴷⴰⵢ ⵉⴹⴻⵎⵏⴻⵏ - ⵓⵔ ⵏⵓⵍⵉ ⴰⵔⴰ ⴰⵟⴰⵙ ⵏ ⵢⵉⵙⴻⴳⴳⴰⵙⴻⵏ - ⵖⴻⵔ 20.000 ⴷⴰ ⵙⴻⴳ 1 ⵢⵓⵏⵢⵓ 2020. ⵜⵉⵖⵜⵉⵙⵜ-ⴰ ⵜⴻⵍⵍⴰ-ⴷ ⵖⴰⵙ ⴰⴽⴽⴻⵏ ⵍⵍⴰⵏⵜ ⵜⵓⵛⴹⵉⵡⵉⵏ ⵏ ⵜⴻⴷⵔⵉⵎⵜ, ⴰⵚⵓⴱⴱⵓ ⵏ ⵙⵙⵓⵎⴰ ⵏ ⵣⵣⵉⵜ, ⴷ ⵍⴻⵔⵢⵓⵢ ⵏ ⵛⵓⴼⵉⴷ-19. ⵙⵉⵏ ⵢⵉⵙⴻⴳⴳⴰⵙⴻⵏ ⴽⴰⵏ ⵓⵎⴱⴻⵄⴷ, ⴰⵙⴻⴳⴳⴰⵙ ⵏ 2022 ⵢⴻⵥⵔⴰ ⴰⵄⵉⵡⴻⴷ ⵏ ⵓⵙⴻⵃⵙⴻⴱ ⵏ ⵢⵉⴳⵔⵉⵙⴻⵏ ⴰⵎⴻⵇⵔⴰⵏ ⴰⴽⴽ ⵙⴻⴳ ⵓⵣⴰⵔⵓⴳ (ⵉⵏⴷéⴱⴻⵏⴷⴰⵏⵛⴻ), ⵎⵉ ⵢⵓⵎⴻⵔ ⵓⵙⴻⵍⵡⴰⵢ ⵙ ⵓⴱⴻⴷⴷⴻⵍ ⵏ ⵜⵕⴻⴹⴹⴰ ⵏ ⵍⴱⴰⵕⴻⵎ ⵏ ⵢⵉⵎⵓⵀⴰⵍ ⵏ ⴱⴰⵢⵍⴻⴽ. ⴰⵙⵓⵔⵉⴼ-ⴰ ⵢⴻⴵⴵⴰ ⴰⵙⴰⵍⵉ ⴰⴷ ⵉⵃⴰⵣ ⴰⴽⴽ ⵍⴻⵙⵍⴰⴽ ⴷ ⵔⵔⵟⴰⴱ, ⵙ ⵜⵣⵉⵢⴷⴰ ⵢⴻⵡⵡⴹⴻⵏ ⴳⴰⵔ 4500 ⴷ 8500 ⴷⴰ ⵉ ⵡⴰⵢⵢⵓⵔ, ⵏⴻⵖ 47% ⴷⴻⴳ ⵜⵍⴰⵜⴰ ⵉⵙⴻⴳⴳⴰⵙⴻⵏ (2022-2023-2024).
ⵜⵉⵣⵉⵢⴷⵉⵡⵉⵏ-ⴰ ⵓⵔ ⵃⴱⵉⵙⴻⵏⵜ ⴰⵔⴰ ⴽⴰⵏ ⴷⴻⴳ ⵡⴰⴷⴷⴰⵍ ⴰⴳⴻⵊⴷⴰⵏ, ⵎⴻⵄⵏⴰ ⵃⴰⵣⴻⵏⵜ ⵓⵍⴰ ⴷ ⵜⵉⵡⵉⵔⵉⵏ ⴷ ⵢⵉⴱⵓⵍⵉⵙ. ⵔⵏⵓ ⵖⴻⵔ-ⵙ, ⵢⴻⴽⴽⴻⵙ ⵍⵃⴰⴽⴻⵎ ⵜⴰⵥⴻⵜ ⵖⴻⴼ ⴷⴷⴻⵅⴻⵍ (ⵉⵔⴳ) ⵉ ⵡⵉⴷ ⵢⴻⵙⵄⴰⵏ ⴷⴷⴰⵡ ⵏ 30.000 ⴷⴰ, ⴷ ⴰⵢⴻⵏ ⵉ ⵏⴻⴼⵄⴻⵏ ⴰⵣⴰⵍ ⵏ 6.5 ⵏ ⵢⵉⵎⴻⵍⵢⴰⵏ ⵏ ⵢⵉⵅⴻⴷⴷⴰⵎⴻⵏ. ⵜⵉⵖⵜⵉⵙⵜ-ⴰ ⵜⴻⵍⵍⴰ ⴷ ⴰⵟⵟⴰⴼ ⴷⴻⴳ ⵢⵉⵡⴻⵏ ⵏ ⵍⴻⵄⵀⵓⴷ ⵉ ⵢⴻⴼⴽⴰ ⵓⵙⴻⵍⵡⴰⵢ ⵎⵉ ⴷ-ⵉⵜⵔⴰⵛⴰⵃ ⵖⴻⵔ ⵜⵙⴻⵍⵡⵉⵜ ⴷⴻⴳ 2019.
ⵙⵙⴻⵔ ⵏ ⵢⵉⴱⴻⴷⴷⵉⵍⴻⵏ ⵉⵎⴻⵜⵜⵉⵢⴻⵏ ⵉ ⵢⴻⵙⴼⴰⵢⴷⵉⵏ ⵢⵉⵎⵓⵀⴰⵍ ⵏ ⵜⴻⵣⵎⴻⵔⵜ ⵎⴳⴰⵍ ⵛⵓⴼⵉⴷ-19 ⵙⴻⴳ 2020, ⴰⵙⴻⵍⵡⴰⵢ ⵢⴻⵙⵙⴰⵡⴻⴹ ⴰⴷ ⵢⴻⵔⵏⵓ ⴰⵟⴰⵙ ⵉ ⵢⵉⵙⴻⵍⵎⴰⴷⴻⵏ (ⵍⵎⵓⵄⴻⵍⵍⵉⵎⵉⵏ), ⵍⴰⴷⵖⴰ ⴳⴰⵔ 2023 ⴷ 2024, ⵙ ⵓⵙⴻⴱⴷⴻⴷ ⵏ ⵏⵏⵉⴹⴰⵎ ⵏ ⵜⴻⵕⴹⴰ ⴰⵎⴰⵢⵏⵓⵜ ⴷ ⵓⵙⴻⴳⴳⴻⵎ ⵏ ⵓⵙⵏⵉⴼ. ⵜⵉⵣⵉⵢⴷⵉⵡⵉⵏ-ⴰ ⵡⵡⴹⴻⵏⵜ ⵖⴻⵔ 30% ⵙ ⵓⵖⴻⵍⵍⵓⵢ ⵙ ⴷⴻⴼⴼⵉⵔ (ⵔⴰⴱⴱⴻⵍ), ⵖⴻⴼ ⵃⵙⴰⴱ ⵏ ⵔⵔⴻⵜⴱⴰ ⴷ ⴷⴷⴰⵔⴰⵊⴰ.
ⵜⵉⵖⵜⵉⵙⵜ ⵏ ⵓⵙⴻⵍⵡⴰⵢ ⴷⴻⴳ ⵓⵙⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⴰⵏⴻⴳⴳⴰⵔⵓ (30 ⵡⴰⵎⴱⴻⵔ 2025) ⵜⴻⵔⵏⴰ ⴰⵙⵓⵔⵉⴼ ⴰⵎⴰⵢⵏⵓⵜ, ⵉⵎⵉ ⵢⵓⵍⵉ ⵓⵖⵔⵓⴷ ⴰⵖⴻⵍⵏⴰⵡ ⴰⴷⴷⴰⵢ ⵉⴹⴻⵎⵏⴻⵏ (ⵙⵏⵎⴳ) ⵙⴻⴳ 20.000 ⴷⴰ ⵖⴻⵔ 24.000 ⴷⴰ, ⴰⵔⴰ ⵢⴻⴱⴷⵓⵏ ⵙⴻⴳ ⵢⴻⵏⵏⴰⵢⴻⵔ 2026. ⴷ ⵜⵉⵣⵉⵢⴷⴰ ⵜⴰⵎⴻⵇⵔⴰⵏⵜ ⴰⴽⴽ ⵉ ⵜⴻⵥⵔⴰ ⵜⵎⵓⵔⵜ, ⴰⵔⴰ ⵉⵄⴰⵡⵏⴻⵏ ⴰⵟⴰⵙ ⵏ ⵢⵉⵅⴻⴷⴷⴰⵎⴻⵏ.
ⵜⵉⵣⵉⵢⴷⴰ ⴷⴻⴳ ⵜⵖⵏⵏⴰⵏⵜⵉⵏ, ⵜⴰⵎⴻⵏⵄⵓⵜ ⵏ ⵜⵖⴰⵍⴰ ⴷ ⴷⴷⴻⵎ ⵉ ⵢⵉⴼⴻⵍⵍⴰⵃⴻⵏ
ⴷⴻⴳ ⵓⴱⵔⵉⴷ-ⴰ, ⴰⵙⴻⵍⵡⴰⵢ ⵉⵀⴻⵍⵍⴻⵍ ⴷⴻⴳ 2021 ⵖⴻⴼ ⵜⵎⴻⵏⵄⵓⵜ ⵏ ⵜⵖⴰⵍⴰ (ⴰⵍⵍⵓⵛⴰⵜⵉⵓⵏ ⵛⵀⵯⵎⴰⴳⴻ) ⵉ ⴷ-ⵢⴻⵜⵜⵓⴳⵔⴻⵏ ⴷⴻⴳ ⵓⵙⴰⴹⵓⴼ ⵏ ⵜⴻⴷⵔⵉⵎⵜ 2022. ⴷⵣⵣⴰⵢⴻⵔ ⵜⴻⵍⵍⴰ ⴷ ⵜⴰⵎⵓⵔⵜ ⵜⴰⵎⴻⵣⵡⴰⵔⵓⵜ ⴷⴻⴳ ⵡⴰⵄⵔⴰⴱⴻⵏ ⴷ ⵜⴼⵔⵉⵇⵜ ⵉ ⵉⵅⴻⴷⵎⴻⵏ ⵜⴰⵎⴻⵏⵄⵓⵜ ⵜⵓⵏⵚⵉⴱⵜ ⵉ ⵢⵉⵍⵎⴻⵥⵢⴻⵏ ⵉ ⵢⴻⵜⵜⵏⴰⴷⵉⵏ ⵖⴻⴼ ⵓⵅⴻⴷⴷⵉⵎ. ⵜⴻⴱⴷⴰ ⵙ 13.000 ⴷⴰ ⴷⴻⴳ 2022, ⵙⵢⵉⵏ ⴰⵙⴻⵍⵡⴰⵢ ⵢⴻⵔⵔⴰ-ⵜⵜ ⵖⴻⵔ 15.000 ⴷⴰ ⴷⴻⴳ ⵜⴰⴳⴳⴰⵔⴰ ⵏ 2022, ⵙ ⵓⴹⵎⴰⵏ ⵏ ⵜⴻⵖⵜⵉⵙⵜ ⵜⴻⵣⵎⴻⵔⵜ (ⵍⴰ ⵛⴰⵔⵜⴻ ⵛⵀⵉⴼⴰ).
ⴷⴻⴳ ⵓⵙⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⴰⵏⴻⴳⴳⴰⵔⵓ, ⴰⵙⴻⵍⵡⴰⵢ ⵉⵇⴻⵔⵔⴻⵔ ⴰⴷ ⵢⴻⵔⵏⵓ ⵜⴰⵎⴻⵏⵄⵓⵜ-ⴰ ⵖⴻⵔ 18.000 ⴷⴰ, ⵉⵡⴰⴽⴽⴻⵏ ⴰⴷ ⵜⴻⵇⵇⵉⵎ ⴷ ⴰⵍⵍⴰⵍ ⵉ ⵉⵄⴰⵡⵏⴻⵏ ⵉⵍⵎⴻⵥⵢⴻⵏ ⴰⴷ ⴽⴻⵛⵎⴻⵏ ⵖⴻⵔ ⵙⵙⵓⵇ ⵏ ⵓⵅⴻⴷⴷⵉⵎ ⵙ ⴷⴷⴻⵅⴻⵍ ⵉⵃⴻⵔⵣⴻⵏ ⵍⵃⴻⵔⵎⴰ-ⵏⵙⴻⵏ. ⴰⵙⴻⵍⵡⴰⵢ ⵢⴻⴼⴽⴰ ⴷⴰⵖⴻⵏ ⴰⵣⴰⵍ ⵎⴻⵇⵇⵔⴻⵏ ⵉ ⵢⵉⵎⵖⴰⵔⴻⵏ (ⵉⵎⴻⵜⵜⵡⴰⴽⵍⵙⴻⵏ) ⵉ ⵢⴻⵙⴼⴰⵢⴷⵉⵏ ⵙ ⵜⵣⵉⵢⴷⵉⵡⵉⵏ ⴳⴰⵔ 10 ⴷ 15% ⴷⴻⴳ 2024, ⴷ ⵜⴰⵊⵎⵉⵍⵜ ⵉ ⵍⴻⵄⵜⴰⴱ-ⵏⵙⴻⵏ.
ⵖⴻⴼ ⵡⴰⵢⴰ, ⴰⵙⴻⵍⵡⴰⵢ ⵉⵇⴻⵔⵔⴻⵔ ⴰⵙⴰⵍⵉ ⵏ ⵡⴰⴷⴷⴰⵢ ⵏ ⵜⵖⵏⵏⴰⵏⵜⵉⵏ ⵏ ⵜⴻⵖⵔⴻⵙ (ⵔⴻⵜⵔⴰⵉⵜⴻ) ⵖⴻⵔ 15.000 ⴷⴰ ⵉ ⵡⵉⴷ ⵢⴻⵟⵟⴼⴻⵏ ⴷⴷⴰⵡ ⵏ 10.000 ⴷⴰ, ⴷ 20.000 ⴷⴰ ⵉ ⵡⵉⴷ ⵢⴻⵟⵟⴼⴻⵏ 15.000 ⴷⴰ. ⴰⵙⴻⵍⵡⴰⵢ ⵢⴻⴼⴽⴰ ⵍⴰⵎⴻⵔ ⴷⴻⴳ ⵓⵙⵇⴰⵎⵓ ⴰⵏⴻⴳⴳⴰⵔⵓ ⵉⵡⴰⴽⴽⴻⵏ ⴰⴷ ⴷ-ⴼⴽⴻⵏ ⵉⵙⵓⵎⴰⵔⴻⵏ ⵏⵏⵉⴹⴻⵏ ⵉ ⵓⵙⴰⵍⵉ ⵏ ⵜⵖⵏⵏⴰⵏⵜⵉⵏ, ⴰⴷ ⵜⴻⵏ-ⵜ-ⴷⵔⴻⵙ ⵜⵏⴻⵖⵍⴰⴼⵜ ⵏ ⵜⴻⴷⵔⵉⵎⵜ ⴷ ⵓⵙⵇⴰⵎⵓ ⵏ ⵔⴻⵃⴱⴰ, ⵓⵇⴱⴻⵍ ⴰⴷ ⵜⵜⵡⴰⴼⴻⵔⵇⴻⵏⵜ ⴷⴻⴳ ⵓⵙⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⵉ ⴷ-ⵉⵜⴻⴷⴷⵓⵏ.
ⴷⴻⴳ 2023, ⴰⵙⴻⵍⵡⴰⵢ ⵢⴻⵙⵙⴰⵡⴻⴹ ⵜⴻⴷⵔⵉⵎⵜ ⵏ ⵜⴷⵓⴽⵍⵉ ⵖⴻⵔ 12.000 ⴷⴰ ⴷ 7.000 ⴷⴰ. ⵔⵏⵓ ⵖⴻⵔ-ⵙ, ⵢⴻⵍⵍⴰ ⵓⵙⴰⵍⵉ ⵏ ⵜⴻⴷⵔⵉⵎⵜ ⵏ ⵜⵎⴰⵔⵔⵉⵜ ⵖⴻⵔ 750 ⴻⵓⵔⵓ ⵉ ⵢⵉⵎⵇⵔⴰⵏⴻⵏ ⴷ 300 ⴻⵓⵔⵓ ⵉ ⵢⵉⵎⵥⵢⴰⵏⴻⵏ, ⴷ ⵓⵙⴰⵍⵉ ⵏ ⵜⴻⴷⵔⵉⵎⵜ ⵏ ⵢⵉⵏⴻⵍⵎⴰⴷⴻⵏ. ⵢⴻⵜⵜⵓⵏⴻⴼⴽ ⴷⴰⵖⴻⵏ ⵓⵃⵔⵉⵛ ⵏⵏⵉⴹⴻⵏ ⵏ ⵜⵉⴼⵜⴰⵔⵉⵏ ⵏ ⵍⵃⴻⴵⴵ ⵉ ⵢⵉⵎⵖⴰⵔⴻⵏ, ⴷ ⵓⴽⴰⴼⴻⵍ ⵙ ⵡⴰⵟⵟⴰⵏ ⵏ ⵍⴽⵓⵏⵙⵉⵔ ⵉ ⵡⵉⴷ ⵓⵔ ⵏⴻⵙⵄⵉ ⴰⵔⴰ ⴰⵃⵔⴰⵣ ⴰⵎⴻⵜⵜⵉ.
ⴰⵃⵔⵉⵛ ⵏ ⵜⴼⴻⵍⵍⴰⵃⵜ ⵢⴻⵍⵍⴰ ⴷ ⴰⴳⴻⵊⴷⴰⵏ, ⵉⵎⵉ ⴷ ⵏⴻⵜⵜⴰ ⵉ ⴷ ⵍⵍⵙⴰⵙ ⵏ ⵍⴰⵎⴰⵏ ⴰⵖⴻⵔⵙⵉⵡ. ⴰⵙⴻⵍⵡⴰⵢ ⵢⴻⴷⴷⴻⵎ ⵜⵉⵖⵜⴰⵙⵉⵏ ⵙⴻⴳ 2020, ⴰⵎ ⵓⵙⴰⵍⵉ ⵏ ⵙⵙⵓⵎⴰ ⵏ ⵓⵖⵍⴰⵢ ⵏ ⵢⵉⵎⴻⵏⴷⵉ, ⴰⴷⴻⵍⵍⴻⵍ ⵏ ⵢⵉⵎⴼⴰⵔⴰⵙⴻⵏ ⵏ ⵢⵉⴼⴽⵉ, ⴷ ⵜⵓⵍⵢⴰ ⵏ ⵍⴻⵇⵔⵓⴹ ⵉ ⵢⵉⵙⴰⴷⵓⵔⴻⵏ ⵏ ⵓⵙⴻⵎⵎⵉⴹ ⵉⵡⴰⴽⴽⴻⵏ ⴰⴷ ⵃⴰⵔⴱⴻⵏ ⴰⵖⵍⴰⵢ ⵏ ⵙⵙⵓⵎⴰ (ⵍⵎⵓⴹⴰⵔⴰⴱⴰ).
ⵜⵉⵖⵜⴰⵙⵉⵏ-ⴰ ⵡⵡⵉⵏⵜ-ⴷ ⵜⴰⵍⵡⵉⵜ ⴷⴻⴳ ⵙⵙⵓⵇ ⵏ ⵢⵉⴼⴰⵔⴰⵙⴻⵏ ⵉⴼⴻⵍⵍⴰⵃⴻⵏ ⴷ ⵓⵙⴻⴳⴳⴻⵎ ⵏ ⴷⴷⴻⵅⴻⵍ ⵏ ⵢⵉⴼⴻⵍⵍⴰⵃⴻⵏ. ⴰⵢⴻⵏ ⵉ ⴷ-ⴱⴰⵏⴻⵏ ⵖⴻⴼ ⵓⵎⵓⵖⵔⵉⵙ ⵙ ⵓⵃⴽⴰⵎ ⴷⴻⴳ ⵙⵙⵓⵎⴰ. ⵉⵙⴻⴼⴽ ⴰⴷ ⵏⵥⴻⵔ ⴱⴻⵍⵍⵉ ⵜⵣⵉⵢⴷⴰ ⵏ ⵙⵙⵓⵎⴰ (ⵉⵏⴼⵍⴰⵜⵉⵓⵏ) ⵜⴻⵖⵍⵉ ⵖⴻⵔ 2.2% ⴷⴻⴳ ⵜⴰⴳⴳⴰⵔⴰ ⵏ ⵛⵜⴻⵎⴱⴻⵔ ⵢⴻⵣⵔⵉⵏ.
ⴰⵙⴻⵍⵡⴰⵢ ⵓⵔ ⵢⴻⵄⵟⵟⴻⵍ ⴰⵔⴰ ⴷⴻⴳ ⵓⴹⵎⴰⵏ ⵏ ⵢⵉⵣⴰⵎⴰⵔⴻⵏ ⵏ ⵍⵄⵉⴷ ⵙ ⵙⵙⵓⵎⴰ ⵢⴻⵍⵀⴰⵏ, ⵉⵎⵉ ⵢⴻⵇⴱⴻⵍ ⴷⴻⴳ ⵎⴻⵖⵔⴻⵙ 2025 ⴰⴷ ⴷ-ⴰⴳⵎⴻⵏ ⴰⵣⴰⵍ ⵏ ⵓⵎⴻⵍⵢⵓⵏ ⵏ ⵢⵉⵇⴻⵕⵕⵓⵢⵉⵏ ⵏ ⵍⵎⴰⵍ, ⴱⵍⴰ ⵜⴻⵡⵡⵙⵉⵡⵉⵏ, ⵉⵡⴰⴽⴽⴻⵏ ⴰⴷ ⵜⴻⵇⵇⵉⵎ ⵙⵙⵓⵎⴰ ⴷ ⵜⴰⵎⴻⵔⴱⵓⵃⵜ ⴷⴻⴳ ⵍⵎⵓⵏⴰⵙⴰⴱⴰⵜ ⵏ ⴷⴷⵉⵏ.
ⴰⵔⵏⵓ ⵖⴻⵔ
