ⵜⴻⵙⴱⴻⴳⴳⴻⵏ-ⴷ ⵜⵎⴰⴷⴷⴰⵙⵜ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵡⴰⴽⴽⴻⵏ ⵏ ⵜⵎⴻⵥⵔⵉ (ⵢⵓⵏⵉⵙⵉⴼ), ⴱⴻⵍⵍⵉ ⵍⴰⵥ, ⵉⵎⴻⵏⵏⴰⵖⴻⵏ ⴷ ⵡⴰⵟⵟⴰⵏⴻⵏ ⵜⵜⴰⴳⴳⴰⴷⴻⵏ ⵜⵓⴷⴻⵔⵜ ⵏ ⵢⵉⵎⴻⵍⵢⴰⵢⴻⵏ ⵏ ⵢⵉⴳⴻⵔⴷⴰⵏ ⴷⴻⴳ ⵓⵙⴻⴳⴳⴰⵙ ⵏ 2025. ⵜⴻⵏⵏⴰ-ⴷ ⵜⵎⴰⴷⴷⴰⵙⵜ-ⴰⴳⵉ ⴷⴻⴳ ⵓⵙⴰⵍⵉ-ⵉⵏⴻⵙ ⴰⵙⴻⴳⴳⴰⵙⴰⵏ ⵏ 2025, ⴱⴻⵍⵍⵉ "ⵉⴳⴻⵔⴷⴰⵏ ⴷⴻⴳ ⵜⵎⴻⵏⵏⴰⴹⵉⵏ ⵏ ⵢⵉⵎⴻⵏⵏⴰⵖⴻⵏ, ⴰⵎ ⵙⵓⴷⴰⵏ ⴷ ⵓⴳⵣⵓⵎ ⵏ ⵖⴰⵣⴰ, ⵜⵜⵎⴰⴳⴰⵔⴻⵏ ⵜⴰⵎⴻⵜⵜⴰⵏⵜ ⵢⴰⵍ ⴰⵙⵙ".
ⴷⴻⴳ ⵜⵎⴻⵏⵏⴰⴹⵉⵏ ⵏ ⴷⴰⵔⴼⵓⵔ ⴷⴻⴳ ⵙⵓⴷⴰⵏ, ⵜⴰⵎⴰⴷⴷⴰⵙⵜ ⵜⵓⴼⴰ-ⴷ ⵍⴰⵥ ⴷ ⴰⵎⴻⵇⵇⵔⴰⵏ ⴷⴻⴳ ⵢⵉⵙⴻⴳⴳⴰⵙⴻⵏ ⵏ 2024 ⴷ 2025. ⵎⴰ ⴷⴻⴳ ⵓⴳⵣⵓⵎ ⵏ ⵖⴰⵣⴰ, ⴱⴱⴻⵕⵕⴻⵃⴻⵏ ⵙ ⵍⴰⵥ ⴷ ⴰⵎⴻⵇⵇⵔⴰⵏ ⴷⴻⴳ ⵢⵉⵎⵓⴽⴰⵏ ⵏ ⵜⴻⵎⴷⵉⵏⵜ ⵏ ⵖⴰⵣⴰ ⴷⴻⴳ ⵓⵏⴻⴱⴷⵓ ⵏ 2025 ⴷⴻⴼⴼⵉⵔ ⵏ ⵓⵣⴷⴰⵎ ⵏ ⵚⴻⵢⵢⵓⵏ ⴷ ⵓⵃⵚⴰⵔ ⵉ ⵢⴻⴳⴷⴻⵍⵏ ⵜⴰⵍⴻⵍⵜ ⵏ ⵓⵏⴻⵍⵍⴻⵢ. ⵖⴰⵙ ⴰⴽⴽⴻⵏ ⵜⵓⵔⴰ ⵓⵍⴰⵛ ⵍⴰⵥ ⴷ ⴰⵎⴻⵇⵇⵔⴰⵏ ⵙ ⵓⴱⵔⵉⴷ ⵓⵏⵚⵉⴱ, ⵍⴰⵎⴻⵄⵏⴰ ⵜⴰⴳⵏⵉⵜ ⵎⴰⵣⴰⵍ-ⵉⵜⵜ ⵜⴻⵡⵄⴻⵔ, ⴰⵏⴷⴰ 100 ⵏ ⵢⵉⴳⵉⵎⴰⵏ ⵏ ⵢⵉⴳⴻⵔⴷⴰⵏ ⴷⴻⴳ ⵓⴳⵣⵓⵎ-ⴰⴳⵉ ⵜⵜⵉⴷⵉⵔⴻⵏ ⴷⴻⴳ ⵍⴰⵥ ⴰⵎⴻⵇⵇⵔⴰⵏ, ⴰⴽⴽⴻⵏ ⵉ ⴷ-ⵢⴻⵏⵏⴰ ⵓⵙⴰⵍⵉ.
ⵜⴻⵙⵙⴻⴽⵏⴻⵢ-ⴷ ⵢⵓⵏⵉⵙⵉⴼ ⴱⴻⵍⵍⵉ ⴰⵎⴹⴰⵏ ⵏ ⵢⵉⴳⴻⵔⴷⴰⵏ ⴷⴻⴳ ⵜⵎⴻⵏⵏⴰⴹⵉⵏ ⵏ ⵡⵓⴳⵓⵔⴻⵏ ⴷ ⵢⵉⵎⴻⵏⵏⴰⵖⴻⵏ ⵓⵔ ⵢⴻⵍⵍⵉ ⴰⵔⴰ ⴷ ⴰⵎⴻⵇⵇⵔⴰⵏ ⴰⴽⴽ ⴰⵎ ⵜⵓⵔⴰ, ⴰⵏⴷⴰ ⵢⵉⵡⴻⵏ ⴳⴰⵔ ⵅⴻⵎⵙⴰ ⵏ ⵢⵉⴳⴻⵔⴷⴰⵏ ⵢⴻⵜⵜⵉⴷⵉⵔ ⴷⴻⴳ ⵜⴻⴳⵏⴰⵜⵉⵏ-ⴰⴳⵉ, ⴰⵢⴻⵏ ⵢⴻⵍⵍⴰⵏ ⴷ ⵙⵏⴰⵜ ⵏ ⵜⵉⴽⴽⴰⵍ ⵏ ⵡⴰⵎⴹⴰⵏ ⵏ ⵓⵙⴻⴳⴳⴰⵙ 1990. ⴷⴰⵖⴻⵏ, ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵣⴻⵎⵎⴻⵎⴻⵏ ⴰⵎⴹⴰⵏ ⴰⵎⴻⵇⵇⵔⴰⵏ ⵏ ⵓⵙⴻⴼⵙⴻⴷ ⵏ ⵢⵉⵣⴻⵔⴼⴰⵏ ⵏ ⵢⵉⴳⴻⵔⴷⴰⵏ ⴷ ⵓⵣⴷⴰⵎ ⵖⴻⴼ ⵡⵉⴷ ⵉⵅⴻⴷⴷⵎⴻⵏ ⴷⴻⴳ ⵓⵏⴻⵍⵍⴻⵢ, ⴰⵏⴷⴰ ⵣⴻⵎⵎⴻⵎⴻⵏ 41.370 ⵏ ⵜⵓⵛⴹⵉⵡⵉⵏ ⵜⵉⵅⴰⵜⵉⵔⵉⵏ ⴷⴻⴳ 2024, ⵙ ⵜⵎⴻⵔⵏⵉ ⵏ 25% ⵖⴻⴼ ⵓⵙⴻⴳⴳⴰⵙ ⵉ ⴷ-ⵢⴻⵣⵡⴰⵔⴻⵏ.
ⴷⴻⴳ ⵡⴰⵡⴰⵍ-ⵉⵙ, ⴽⵔⵉⵙⵜⵢⴰⵏ ⵛⵏⴰⵢⴷⴻⵔ, ⴰⵏⵎⴰⵀⴰⵍ ⵏ ⵜⵎⴰⴷⴷⴰⵙⵜ-ⴰⴳⵉ ⴷⴻⴳ ⵍⴰⵍⵎⴰⵏ, ⵢⴻⵏⵏⴰ-ⴷ ⴱⴻⵍⵍⵉ ⴷ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⵉ ⴷ-ⵢⴻⴹⵔⴰ ⵍⴰⵥ ⴷ ⴰⵎⴻⵇⵇⵔⴰⵏ ⴷⴻⴳ ⵓⵙⴻⴳⴳⴰⵙ ⵢⵉⵡⴻⵏ ⴷⴻⴳ ⵙⵓⴷⴰⵏ ⴷ ⵓⴳⵣⵓⵎ ⵏ ⵖⴰⵣⴰ. ⵢⴻⵔⵏⴰ-ⴷ ⴱⴻⵍⵍⵉ "ⵍⴰⵥ-ⴰⴳⵉ ⴷⴻⴳ ⵙⵏⴰⵜ ⵏ ⵜⵉⴳⵏⴰⵜⵉⵏ-ⴰⴳⵉ ⴷ ⴰⵎⴷⴰⵏ ⵉ ⵜ-ⵉⴷ-ⵢⵉⵙⵓⴼⴼⵖⴻⵏ ⵙ ⵙⵙⴻⴱⴱⴰ ⵏ ⵢⵉⵎⴻⵏⵏⴰⵖⴻⵏ".
ⵢⴻⵏⵏⴰ-ⴷ ⵛⵏⴰⵢⴷⴻⵔ ⴷⴰⵖⴻⵏ ⴱⴻⵍⵍⵉ "ⵍⴰⵥ ⴷ ⵍⵉⵅⵙⴰⵙ ⵏ ⵢⵉⴳⴻⵔⴷⴰⵏ ⵓⵔ ⵍⵍⵉⵏ ⴰⵔⴰ ⴷ ⵍⵇⴻⴷⵔⴰ ⴰⵎ ⵏⵏⵀⴰⵜⵉ ⵏ ⵜⴳⴰⵎⴰ ⵉ ⴷ-ⵢⴻⵜⵜⴻⴼⴼⵖⴻⵏ ⵙ ⵜⴻⵔⵢⴻⵍⵜ, ⵍⴰⵎⴻⵄⵏⴰ ⴷ ⴰⴼⵛⴰⵍ ⵏ ⵜⵙⴻⵔⵜⵉⵢⵉⵏ ⵏ ⴷⴷⵓⵏⵉⵜ ⴷ ⵜⵎⴻⵜⵜⵉⵢⵉⵏ-ⵏⵏⴻⵖ ⵖⴻⵔ ⵢⵉⴳⴻⵔⴷⴰⵏ". ⵢⴻⵔⵏⴰ-ⴷ ⴱⴻⵍⵍⵉ ⵉⴳⴻⵔⴷⴰⵏ "ⵜⵜⴰⵅⴰⵍⵍⴻⵏ ⵙ ⵡⴰⵣⴰⵍ ⴰⵎⴻⵇⵇⵔⴰⵏ ⵖⴰⵙ ⴰⴽⴽⴻⵏ ⵏⵉⵜⵏⵉ ⴷ ⵉⵎⴻⵍⵍⴰⵍⴻⵏ ⵙⴻⴳ ⵢⵉⵎⴻⵏⵏⴰⵖⴻⵏ-ⴰⴳⵉ". ⵜⴰⵎⴰⴷⴷⴰⵙⵜ ⵓⵔ ⵜⴻⵜⵜⵎⴰⴳⴰⵔ ⴰⵔⴰ ⴰⴷ ⵜⵉⴼⵙⵓⵙ ⵜⴻⴳⵏⵉⵜ ⵜⵓⵔⴰ, ⵍⴰⵎⴻⵄⵏⴰ ⵜⴻⵜⵜⵔⴰⵊⵓ ⴱⴻⵍⵍⵉ 2026 ⴰⴷ ⵢⵉⵍⵉ ⴷⴰⵖⴻⵏ ⴷ ⴰⵙⴻⴳⴳⴰⵙ ⵏ ⵡⵓⴳⵓⵔⴻⵏ, ⵢⴻⵔⵏⴰ ⴰⴷ ⵜⴽⴻⵎⵎⴻⵍ ⴰⴷ ⵜⵉⵅⴻⴹⴷⴻⵎ ⴰⴽⴽ ⴰⵢⴻⵏ ⵜⴻⵣⵎⴻⵔ ⵉ ⵓⵃⵔⴰⵣ ⵏ ⵢⵉⴳⴻⵔⴷⴰⵏ.
ⴰⵔⵏⵓ ⵖⴻⵔ
