ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⵍⵡⴰⵢ ⵓⵏⵖⵍⴰⴼ ⵏ ⵜⵎⵉⵙⴰⵍ ⵏ ⴷⴷⵉⵏ ⴷ ⵍⵃⴰⴱⵓⵙ, ⵎⴰⵙⵙ ⵢⵓⵙⴻⴼ ⴱⴻⵍⵎⴻⵀⴷⵉ, ⵢⴻⴷⴷⵓⴽⴽⴻⵍ ⴷ ⵓⵏⵖⵍⴰⴼ ⵏ ⵍⵃⴻⵊⵊ ⴷ ⵍⵄⵓⵎⵔⴰ ⵏ ⵜⴳⴷⵓⴷⴰ ⵏ ⵙⵙⵄⵓⴷⵉⵢⴰ ⵜⴰⵎⴰⵣⵓⵣⵜ, ⵎⴰⵙⵙ ⵜⵓⵡⴼⵉⵇ ⴱⵉⵏ ⴼⵓⵡⵣⴰⵏ ⴰⵔⵔⴰⴱⵉⵄⴰ, ⵢⵉⵡⴻⵜ ⵏ ⵜⵉⵎⵍⵉⵍⵉⵜ ⵏ ⵓⵡⴻⵍⵍⴻⵀ ⵉ ⵜⵎⴻⵔⵙⴻⵍⵉⵏ (ⵡⴰⴽⴰⵍⴰⵜ) ⵏ ⵜⵎⴻⵔⵔⵉⵜ ⴷ ⵡⴰⵙⵙⴰⵢ ⵉⵇⴷⴻⵛⴻⵏ ⴷⴻⴳ ⵓⵙⴻⴳⴳⴻⵎ ⵏ ⵍⵃⴻⵊⵊ. ⵜⵉⵎⵍⵉⵍⵉⵜ-ⴰⴳⵉ ⵜⴻⵔⵣⴰ ⴰⵏⴰⴷⵉ ⵏ ⵢⵉⵙⵓⵔⴰ ⵏ ⵓⵙⴻⴳⴳⴻⵎ ⵉ ⵡⴰⴽⴽⴻⵏ ⴰⴷ ⵙⵏⴻⴼⵍⴰⵢⴻⵏ ⵍⴻⵇⴷⵉⵛ ⵉ ⴷ-ⵜⵜⴰⴽⴽⴻⵏ ⵉ ⵢⵉⵎⴷⴰⵏⴻⵏ.
ⴰⴽⴽⴻⵏ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ, ⵎⴰⵙⵙ ⵢⵓⵙⴻⴼ ⴱⴻⵍⵎⴻⵀⴷⵉ ⵢⴻⵙⵙⴻⵊⴷⴻⴷ ⴱⴻⵍⵍⵉ ⵓⵡⴰⵏⴰⴽ ⴰⵣⵣⴰⵢⵔⵉ, ⵙ ⵢⵉⵏⴻⴹⴰⴼ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵢⴻⵜⵜⴰⴽⴽ ⴰⵣⴰⵍ ⴰⵎⴻⵇⵇⵔⴰⵏ ⵉ ⵜⵎⵉⵙⴰⵍ ⵏ ⵍⵃⴻⵊⵊ ⴷ ⵍⵄⵓⵎⵔⴰ. ⵢⴻⵏⵏⴰ-ⴷ ⴱⴻⵍⵍⵉ ⵜⴰⵏⴻⴱⴱⴰⴹⵜ, ⵙ ⵓⵎⵢⴻⵍⵍⴻⵍ ⴳⴰⵔ ⵎⴰⵕⵕⴰ ⵢⵉⵃⵔⵉⵛⴻⵏ, ⵜⴻⵜⵜⴰⴳⵡⴰⵢ ⴰⴷ ⵜⴻⴹⵎⴻⵏ ⵍⵍⵃⴰⵍⴰ ⵢⴻⵍⵀⴰⵏ ⵏ ⵓⵙⴻⴳⴳⴻⵎ, ⵜⴰⵣⵎⴻⵔⵜ ⴷ ⵡⴰⵙⵙⴰⵢ ⵉ ⵢⵉⵃⴻⵊⵊⴰⵊⴻⵏ. ⵢⴻⵔⵏⴰ-ⴷ ⴱⴻⵍⵍⵉ ⴰⵔⴻⴱⴱⴰⵃ ⵏ ⵓⵙⴻⴳⴳⴰⵙ ⵉⵄⴻⴷⴷⴰⵏ ⴷ ⵜⴰⵔⵉⵛⵜ ⵉ ⵡⴰⴽⴽⴻⵏ ⴰⴷ ⴽⴻⵎⵎⵍⴻⵏ ⴰⵎⵢⴰⵡⴰⵙ ⵢⴻⴷⴷⵓⴽⴽⵍⴻⵏ.
ⵙⴻⴳ ⵍⵊⵉⵀⴰ-ⵙ, ⴰⵏⵖⵍⴰⴼ ⵏ ⵙⵙⵄⵓⴷⵉⵢⴰ ⵎⴰⵙⵙ ⵜⵓⵡⴼⵉⵇ ⴰⵔⵔⴰⴱⵉⵄⴰ, ⵢⴻⵏⵏⴰ-ⴷ ⴱⴻⵍⵍⵉ ⵜⴰⵎⵓⵔⵜ-ⵉⵙ ⵜⴻⴱⵯⴰ ⴰⴷ ⵜⴻⴼⴽ ⵍⴻⵇⴷⵉⵛ ⵓⵏⵏⵉⴳ ⵉ ⵢⵉⵏⴻⴱⴳⴰⵡⴻⵏ ⵏ ⵔⵔⴻⴱⴱⵉ. ⵢⴻⴼⴽⴰ ⴰⵣⴰⵍ ⵉ ⵓⵎⵢⴻⵍⵍⴻⵍ ⵢⴻⵍⵍⴰⵏ ⴷ ⵍⵣⵣⴰⵢⴻⵔ ⵢⴻⵔⵏⴰ ⵢⴻⵏⵏⴰ-ⴷ ⴱⴻⵍⵍⵉ ⴰⴷ ⴽⴻⵎⵎⵍⴻⵏ ⴰⴷ ⵙⴻⴳⴳⵎⴻⵏ ⵍⴻⵇⴷⵉⵛ-ⴰⴳⵉ ⴷⴻⴳ ⵢⵉⵙⴻⴳⴳⴰⵙⴻⵏ ⵉ ⴷ-ⵢⴻⴷⴷⵓⵏ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵉⵣⴻⵔⴼⴰⵏ ⵏ ⵢⵉⵎⴷⴰⵏⴻⵏ.
ⵓⵏⴻⴱⴷⴰⴷ ⴰⵎⴰⵜⵓ ⵏ ⵡⴰⵙⵉⵔⴰ ⴰⵖⴻⵍⵏⴰⵡ ⵏ ⵍⵃⴻⵊⵊ ⴷ ⵍⵄⵓⵎⵔⴰ, ⵎⴰⵙⵙ ⵟⵟⴰⵀⴻⵔ ⴱⵔⴰⵢⴻⴽ, ⵢⴻⴼⴽⴰ-ⴷ ⵢⵉⵡⴻⵏ ⵡⴰⵡⴰⵍ ⵖⴻⴼ ⵡⴰⵣⴰⵍ ⵏ ⵜⵎⵍⵉⵍⵉⵜ-ⴰⴳⵉ ⴷⴻⴳ ⵓⵙⵊⴻⵀⴻⴷ ⵏ ⵓⵎⵢⴰⵡⴰⵙ ⴷⴻⴳ ⵡⴰⵏⵏⴰⵔ. ⵢⴻⵏⵏⴰ-ⴷ ⴱⴻⵍⵍⵉ ⵍⵍⴰⵏ ⵢⵉⵙⵓⵔⴰ ⵉⵎⴰⵢⵏⵓⵜⴻⵏ ⵏ ⵓⵙⴻⴷⵎⴻⵔ ⴷ ⵓⵃⴰⴷⴰⵔ ⵉ ⵡⴰⴽⴽⴻⵏ ⴰⴷ ⵔⵔⴻⵏ ⵜⴰⵢⵏⵉⵜ ⵉ ⵍⴻⴱⵖⵉ ⵏ ⵓⵡⴰⵏⴰⴽ ⴰⵣⵣⴰⵢⵔⵉ.
ⴷⴻⴳ ⵜⴰⴳⴳⴰⵔⴰ, ⴰⵎⴻⵎⵎⴻⵜⵜⵉⵍ ⵏ ⵜⵎⴻⵔⵙⴻⵍⵉⵏ ⵏ ⵜⵎⴻⵔⵔⵉⵜ, ⵎⴰⵙⵙ ⵄⴻⴱⴷⵓⵍⵃⴰⵎⵉⴷ ⴱⴻⵛⵉⵔ, ⵢⴻⵏⵏⴰ-ⴷ ⴱⴻⵍⵍⵉ ⵜⵉⵎⴻⵔⵙⴻⵍⵉⵏ-ⴰⴳⵉ ⵡⴻⵊⵊⴷⴻⵏⵜ ⴰⴷ ⵄⴻⴷⴷⴻⵏⵜ ⵖⴻⴼ ⵢⵉⵏⴻⴹⴰⴼ ⵏ ⵙⵏⴰⵜ ⵜⵏⴻⵖⵍⴰⴼⵉⵏ. ⴰⴷ ⵇⴷⴻⵛⴻⵏⵜ ⴷ ⵢⵉⵎⴷⵔⴰⵡⴻⵏ ⵉⵊⴻⵀⴷⴻⵏ ⵉ ⵡⴰⴽⴽⴻⵏ ⴰⴷ ⴼⴽⴻⵏⵜ ⵍⴻⵇⴷⵉⵛ ⵢⴻⵍⵀⴰⵏ ⵉ ⵢⵉⵃⴻⵊⵊⴰⵊⴻⵏ ⴷ ⵢⵉⵎⵄⴻⵜⵎⵔⴻⵏ ⵉⵣⵣⴰⵢⵔⵉⵢⴻⵏ.
ⴰⵔⵏⵓ ⵖⴻⵔ
