ⵜⵏⴻⴼⵔⵓⵜ ⵏ ⵙⴱⴻⵏⵢⵓⵍ ⵜⴻⵙⵙⴻⴽⵏⴻⴷ-ⴷ ⵜⵉⴽⴻⵍⵜ ⵏⵏⵉⴹⴻⵏ ⴰⵙⵏⴻⵔⵏⵉ ⵏ ⵢⵉⵣⴻⵟⵟⵡⴰⵏ ⵏ ⵓⵛⴻⴱⴱⴻⵃ ⵏ ⵙⵙⴻⵎ ⵉ ⴷ-ⵉⵜⵜⴻⴷⴷⵓⵏ ⵙⴻⴳ ⵍⵎⴻⵔⵔⵓⴽ ⵖⴻⵔ ⵜⵓⵔⵓⴼⵜ, ⵙⴻⵍⴷ ⵎⵉ ⵜⴻⵙⵙⴻⵔⵔⴻⵙ ⵍⵃⴻⴱⵙ ⵖⴻⴼ ⵅⴻⵎⵙⴰ ⵏ ⵢⵉⵎⵛⴻⴽⴽⴰⵢⴻⵏ ⵖⴻⴼ ⵜⴻⵎⵙⴰⵍⵜ ⵏ ⵓⵙⵙⴻⴽⵛⴻⵎ ⵏ 13.7 ⵏ ⵢⵉⵟⵓⵏⵏⵓⵏⴻⵏ ⵏ ⵍⵃⵛⵉⵛ ⵖⴻⵔ ⵙⴱⴻⵏⵢⵓⵍ. ⴰⵢⴰⴳⵉ ⵢⴻⵍⵍⴰ-ⴷ ⵙ ⵢⵉⵡⴻⵜ ⵏ ⵜⴽⴰⵎⵢⵓⵏⵜ ⵉ ⴷ-ⵢⴻⴼⴼⵖⴻⵏ ⵙⴻⴳ ⵓⵙⴰⴳⴻⵏ ⵏ ⵏⵏⴰⴹⵓⵔ, ⴷⴻⴳ ⵓⴳⴰⴼⴰ-ⵓⴳⵎⵓⴹ ⵏ ⵜⴳⴻⵍⴷⴰ, ⴷ ⵢⵉⵡⴻⵜ ⵏ ⵜⵎⵓⵀⴻⵍ ⵏ ⵓⵛⴻⴱⴱⴻⵃ ⵜⴰⵎⴻⵇⵇⵔⴰⵏⵜ ⵉ ⴷ-ⵢⵓⵔⴰ ⴷⴻⴳ ⵡⴰⵢⵢⵓⵔⴻⵏ ⵉⵏⴻⴳⴳⵓⵔⴰ.
ⵜⵏⴻⴼⵔⵓⵜ ⵏ ⵜⴻⵎⵏⴰⵟ ⴷⴻⴳ Almería, ⴷⴻⴳ ⵓⵏⵥⵓⵍ-ⵓⴳⵎⵓⴹ ⵏ ⵙⴱⴻⵏⵢⵓⵍ, ⵜⴻⵙⵙⴻⵔⵔⴻⵙ ⴷⴰⵖⴻⵏ ⵜⴰⵛⵛⵓⴹⵜ ⵏ ⵜⴻⴷⵔⵉⵎⵜ (amende) ⵏ 100 ⵏ ⵢⵉⵎⵍⵢⴰⵢⴻⵏ ⵏ ⵢⵉⵔⵓ (Euro) ⵖⴻⴼ ⵢⵉⵎⵛⴻⴽⴽⴰⵢⴻⵏ, ⵙ ⵓⵙⵓⴼⴼⴻⵖ ⵏ ⴽⵓⵣ (4) ⴷⴻⴳ-ⵙⴻⵏ ⵙⴻⴳ ⵡⴰⴽⴰⵍ ⵏ ⵙⴱⴻⵏⵢⵓⵍ ⵉ ⵜⴰⵍⵍⵉⵜ ⵏ ⵙⴰ ⵏ ⵢⵉⵙⴻⴳⴳⴰⵙⴻⵏ ⵙⴻⵍⴷ ⵎⵉ ⴽⴼⴰⵏ ⴽⵔⴰⴷⴻⵜ ⵏ ⵜⵎⵉⴹⵉⵢⵉⵏ ⵏ ⵍⵃⴻⴱⵙ-ⵏⵙⴻⵏ.
ⵜⴰⵎⵙⴰⵍⵜ-ⴰⴳⵉ ⵜⴻⵙⵙⴻⴼⵜⵉ ⵜⵓⴳⴷⵉ ⵏ ⵜⵓⵔⵓⴼⵜ ⵖⴻⴼ ⵓⴽⴻⵎⵎⴻⵍ ⵏ ⵓⵛⴻⴱⴱⴻⵃ ⵏ ⵙⵙⴻⵎ ⵉ ⴷ-ⵉⵜⵜⴻⴷⴷⵓⵏ ⵙ ⵍⴶⴻⵀⴷ ⵙⴻⴳ ⵍⵎⴻⵔⵔⵓⴽ, ⵙ ⵓⵎⵢⴻⵛⵛⴻⵔ ⵏ ⵓⵏⴰⴳⵔⴰⵡ ⵏ ⵍⵎⴻⵅⵣⴻⵏ ⵉ ⵢⴻⵟⴰⵊⵊⴰⵏ ⵉⵣⴻⵟⵟⵡⴰⵏ-ⴰⴳⵉ ⴰⴷ ⵅⴻⴷⵎⴻⵏ ⵎⴻⴱⵍⴰ ⵓⵣⴻⵟⵟⴻⴹ ⵉⵕⴻⵙⵙⴰⵏ, ⵓⵍⴰ ⵎⴰ ⵍⵍⴰⵏ-ⴷ ⵢⵉⵎⵉⵀⵉⵢⴻⵏ ⵉⴶⴻⵀⴷⴻⵏ ⵖⴻⴼ ⵜⵎⴰⵏⴻⴳⵜ ⴷ ⵜⵎⴻⵜⵜⵉ ⵏ ⵜⵎⵓⵔⴰ ⵏ ⵍⴶⵉⵔⴰⵏ ⴷ ⵜⵓⵔⵓⴼⵜ.
ⵜⵏⴻⴼⵔⵓⵜ ⵜⴻⵙⵙⴻⴼⵀⴻⵎ-ⴷ ⴱⴻⵍⵍⵉ ⵢⵉⵎⵓⵛⵓⴱⴱⵃⴻⵏ ⵎⵜⴰⵡⴰⵏ ⵓⵇⴱⴻⵍ ⵢⵓⵏⵢⵓ 2025 ⵉⵡⴰⴽⴽⴻⵏ ⴰⴷ ⴷ-ⴳⵍⵓⵏ ⵙ ⵍⵇⴻⴷⴷ ⴰⵎⴻⵇⵇⵔⴰⵏ ⵏ ⵔⴻⵙⵉⵏ ⵏ ⵍⵇⴻⵏⵏⴻⴱ ⵖⴻⵔ ⵙⴱⴻⵏⵢⵓⵍ ⵉ ⵓⵣⴻⵏⵣⵉ. ⵉⵏⴰⴷⵉⵢⴻⵏ (enquêtes) ⵙⵏⴻⴽⴷⴻⵏ-ⴷ ⴱⴻⵍⵍⵉ ⵙⵙⴻⵎ-ⴰⴳⵉ ⵢⴻⵍⵍⴰ ⵢⴻⴼⴼⵔⴻ ⵙ ⵓⵃⵔⴰⵣ ⴷⴻⴳ ⵜⵍⴻⵎⵎⴰⵙⵜ ⵏ ⵜⵄⴻⴱⴱⴰ ⵏ ⴷⵓⵍⵍⴰⵄ (pastèque) ⴷⴰⵅⴻⵍ ⵏ ⵢⵉⴼⴻⴽⴽⴰⵝ ⵏ ⵓⵒⵍⴰⵙⵜⵉⴽ ⵉ ⵉⵛⵓⴱⴰⵏ ⵍⴱⴰⵟⴰⵟⴰ ⵉⵡⴰⴽⴽⴻⵏ ⵓⵔ ⴷ-ⵟⴰⴽⴻⵏ ⴰⵔⴰ ⵜⴰⵎⴰⵡⵜ ⵢⵉⵎⴻⵥⵍⴰ ⵏ ⵓⵣⴻⵟⵟⴻⴹ.
ⵜⴰⴽⴰⵎⵢⵓⵏⵜ-ⵏⵏⵉ ⵜⴻⴼⴼⴻⵢ ⴰⵙⴰⴳⴻⵏ ⵏ ⵏⵏⴰⴹⵓⵔ ⵖⴻⵔ Almería ⴷⴻⴳ 19 ⵢⵓⵏⵢⵓ 2025, ⵍⴰⵎⴻⵄⵏⴰ ⵍⴱⵓⵍⵉⵙ ⵏ ⵙⴱⴻⵏⵢⵓⵍ ⵍⵍⴰⵏ ⴼⴽⵓⵍⴻⵏ ⵜⵉⴷⴷⵉⵢⵉⵏ-ⵉⵙ ⵙ ⵡⴰⵍⵍⴰⵍ ⵏ ⵓⴹⴼⴻⵔ ⵏ "GPS". ⴰⵢⴰⴳⵉ ⵢⴻⴶⴶⴰ ⵉⵎⵏⴰⴷⵉⵢⴻⵏ ⴰⴷ ⵡⴰⵍⵉⵏ ⴰⴱⵔⵉⴷ-ⵉⵙ ⴰⵔⵎⵉ ⵜⴻⴽⵛⴻⵎ ⵢⵉⵡⴻⵜ ⵏ ⵜⵎⵓⵀⴻⵍ ⵜⴰⵎⴳⵓⵔⵉⵢⴰⵏⵜ ⴷⴻⴳ ⵜⴻⵎⴷⵉⵏⵜ ⵏ Huércal de Almería.
ⵙⴻⵍⴷ ⵓⵏⴻⴽⵛⵓⵎ ⵏ ⵜⴽⴰⵎⵢⵓⵏⵜ ⵖⴻⵔ ⵢⵉⵡⴻⵏ ⵏ ⵍⵎⴰⵅⵣⴻⵏ, ⵍⴱⵓⵍⵉⵙ ⵅⴻⴷⵎⴻⵏ ⵜⵉⴳⴳⴰⵡⵜ ⵏ ⵓⵣⴷⴻⵎ (raid) ⴰⵏⵉⴷⴰ ⵓⴼⴰⵏ ⴰⵣⴰⵍ ⵏ 25 ⵏ ⵢⵉⵎⵍⵢⴰⵢⴻⵏ ⵏ ⵢⵉⵔⵓ ⵏ ⵙⵙⴻⵎ. ⴰⵢⴰⴳⵉ ⵢⴻⵎⵎⴰⵍ-ⴷ ⵍⵇⴻⴷⴷ ⵏ ⵜⵉⴷⴻⵜ ⵏ ⵜⴷⴰⵎⵙⴰ ⵜⵓⴼⴼⵉⵔⵜ (économie parallèle) ⵉ ⵢⴻⵟⵟⴰⴼⴰⵔⴻⵏ ⵜⴰⵏⴻⵣⵣⵓⵜ ⵏ ⵙⵙⴻⵎ ⵏ ⵓⵏⴰⴳⵔⴰⵡ ⵏ ⵍⵎⴻⵅⵣⴻⵏ. ⵜⵏⴻⴼⵔⵓⵜ ⵜⴻⵙⵙⴻⵔⵔⴻⵚ ⴱⴻⵍⵍⵉ ⵢⴰⴽⴽ ⵢⵉⵎⵛⴻⴽⴽⴰⵢⴻⵏ ⵍⵍⴰⵏ ⵥⵔⴰⵏ ⴷ ⴰⵛⵓ ⵉⵄⴻⴱⴱⴰ ⴷⴻⴳ ⵜⴽⴰⵎⵢⵓⵏⵜ, ⵢⴻⵔⵏⴰ ⵜⴰⵎⵙⴰⵍⵜ-ⴰⴳⵉ ⵜⵓⵙⴰ-ⴷ ⴷⴻⴳ ⵓⵣⴻⵏⵣⵉⵖ ⵏ ⵜⵉⴳⴳⴰⵡⵜ ⵏ ⵜⵎⴰⵏⴻⴳⵜ ⵉ ⵡⵓⵎⵉ ⵙⴻⵎⵎⴰⵏ "San Pedro".
ⴰⵔⵏⵓ ⵖⴻⵔ
