ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⴳⴳⴰ ⵜⵏⴻⵖⵍⴰⴼⵜ ⵏ ⵜⵏⴻⵣⵣⵓⵜ ⵜⴰⴷⵉⴳⴰⵏⵜ ⴷ ⵓⵙⴻⴳⴳⴻⵎ ⵏ ⵓⵣⵏⵓⵣⵉ, ⵙ ⵓⵎⵢⴻⵍⵍⴻⵍ ⴷ ⵡⴰⵟⴰⵙ ⵏ ⵢⵉⵃⵔⵉⵛⴻⵏ ⴷ ⵜⵎⴻⵔⵙⴻⵍⵉⵏ ⵏ ⵓⵙⴻⴳⴳⴻⵎ, ⵢⵉⵡⴻⵏ ⵡⴰⵍⴰⵍ ⵢⴻⴷⴷⵓⴽⴽⵍⴻⵏ ⵉ ⵡⴰⴽⴽⴻⵏ ⴰⴷ ⴷ-ⵢⴻⴹⵎⴻⵏ ⴰⴼⵔⴰⵢ ⵏ ⵙⵙⴻⵍⵄⴰ ⴷⴻⴳ ⵢⵉⵙⵡⴰⵇⴻⵏ ⵏ ⵜⵎⵓⵔⵜ ⴷⴻⴳ ⵡⴰⴳⴳⵓⵔ ⵏ ⵔⴻⵎⴹⴰⵏ. ⴰⵢⴰ ⵉ ⴷ-ⵢⴻⵏⵏⴰ ⵡⴰⵎⴻⵙⵜⴰⵏ ⵏ ⵜⵏⴻⴱⴷⴰⴷⵜ ⵏ ⵍⵊⵓⴷⴰ ⴷ ⵓⵃⴰⴷⴰⵔ ⵏ ⵓⵎⵙⴻⵖⵉⵜ ⴷⴻⴳ ⵜⵏⴻⵖⵍⴰⴼⵜ, ⵎⴰⵙⵙ ⵏⵓⵔⴻⴷⴷⵉⵏ ⵃⴰⵔⵉⴷⵉ, ⴰⵙⵙ-ⴰ ⵏ ⵍⴰⵔⴱⵄⴰ.
ⴷⴻⴳ ⵢⵉⵡⴻⵏ ⵡⴰⵡⴰⵍ ⴷⴻⴳ ⵢⵉⵎⴰⵏ ⵏ ⵜⵖⵓⵔⵉ ⵜⴰⵖⴻⵍⵏⴰⵡⵜ, ⵎⴰⵙⵙ ⵃⴰⵔⵉⴷⵉ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ ⵉⵙⵓⵔⴰ-ⴰⴳⵉ ⴱⵯⴰⵏ ⴰⴷ ⴷ-ⵙⵙⴻⵔⵙⴻⵏ ⵙⵙⴻⵍⵄⴰ ⵉ ⵃⵡⴰⵊⴻⵏ ⵢⵉⵎⴻⵣⴷⴰⵖ ⴰⵟⴰⵙ, ⵍⴰⴷⵯⴰ ⵢⵉⴼⴰⵔⵉⵙⴻⵏ ⵏ ⵜⴼⵍⴰⵃⵜ, ⵉ ⵡⴰⴽⴽⴻⵏ ⴰⴷ ⵔⵔⴻⵏ ⵜⴰⵢⵏⵉⵜ ⵉ ⵢⵉⵙⵓⵜⴻⵔⵏ ⵏ ⵢⵉⵎⴷⴰⵏⴻⵏ ⴷⴻⴳ ⵡⴰⴳⴳⵓⵔ-ⴰⴳⵉ. ⵢⴻⵏⵏⴰ-ⴷ ⴱⴻⵍⵍⵉ ⴰⴷ ⵍⴷⵉⵏ ⵢⵉⵙⵡⴰⵇⴻⵏ ⵏ ⵓⵇⴻⵔⵔⴻⴱ ⵙⴻⴳ ⵢⵉⵎⴰⵍ ⵉ ⴷ-ⵢⴻⴷⴷⵓⵏ, ⵢⴻⵔⵏⴰ ⴰⴷ ⵢⵉⵍⵉ ⵢⵉⵡⴻⵏ ⵡⴰⵙⴽⴽⵓⴷ ⴷⴻⴳ ⴽⵓⵍ ⵜⴰⵖⵉⵡⴰⵏⵜ ⵉ ⵡⴰⴽⴽⴻⵏ ⴰⴷ ⴰⵖⴻⵏ ⵢⵉⵎⴷⴰⵏⴻⵏ ⵡⴰⵢⴻⵏ ⵃⵡⴰⵊⴻⵏ ⵙ ⵡⴰⵜⵉⴳ ⵢⴻⵍⵀⴰⵏ.
ⵢⴻⵙⵙⴻⴽⵜⴰ-ⴷ ⴷⴰⵖⴻⵏ ⴰⵏⴰⴹ ⵏ ⵜⵏⴻⵖⵍⴰⴼⵜ ⵉ ⵢⴻⵔⵔⴰⵏ ⵍⵡⴻⵇⵜ ⵏ ⵓⵏⵇⴰⵙ ⵏ ⵡⴰⵜⵉⴳⴻⵏ (Soldes) ⴰⵍⴰⵎⵎⴰ ⴷ ⵡⴰⵙⵙ ⵡⵉⵙ ⴽⵔⴰⴹ ⵏ ⵜⴼⴰⵙⴽⴰ ⵏ ⵍⵄⵉⴷ. ⴰⵢⴰ ⵢⴻⵍⵍⴰ-ⴷ ⵉ ⵡⴰⴽⴽⴻⵏ ⴰⴷ ⵙⵙⵉⵙⵀⴻⵍⴻⵏ ⵜⵓⴷⴻⵔⵜ ⵉ ⵢⵉⵎⴻⵣⴷⴰⵖ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵜⵉⴳ ⵏ ⵙⵙⴻⵍⵄⴰ.
ⵙⴻⴳ ⵍⵊⵉⵀⴰ ⵏ ⵓⵙⴻⴼⵇⴻⴷ, ⵎⴰⵙⵙ ⵃⴰⵔⵉⴷⵉ ⵢⴻⵏⵏⴰ-ⴷ ⴱⴻⵍⵍⵉ ⴰⴷ ⵊⵊⴻⵀⴷⴻⵏ ⵍⴻⵇⴷⵉⵛ ⵏ ⵓⵄⴰⵙⵙ ⴷⴻⴳ ⵡⴰⴳⴳⵓⵔ ⵏ ⵔⴻⵎⴹⴰⵏ. ⴰⴷ ⴷ-ⴽⴽⵓⵏ ⵓⴳⴰⵔ ⵏ ⵢⵉⵅⴻⴷⴷⴰⵎⴻⵏ ⵉ ⵡⴰⴽⴽⴻⵏ ⴰⴷ ⵏⵏⴰⵖⴻⵏ ⵎⴳⴰⵍ ⵜⴰⴽⴻⵔⴹⴰ ⴷ ⵍⴱⴰⵟⴻⵍ ⴷⴻⴳ ⵓⵣⵏⵓⵣⵉ, ⵢⴻⵔⵏⴰ ⴰⴷ ⵃⴰⴷⵔⴻⵏ ⵜⴰⵣⵎⴻⵔⵜ ⵏ ⵢⵉⵎⴷⴰⵏⴻⵏ ⴷ ⵡⴻⴷⵔⵉⵎ-ⵏⵙⴻⵏ.
ⵢⴻⵙⵙⵉⵡⴻⵍ-ⴷ ⴷⴰⵖⴻⵏ ⵖⴻⴼ ⵍⴻⵇⴷⵉⵛ ⵏ ⵓⵙⴰⴽⵉ (Sensibilisation) ⵉ ⵜⴻⴳⴳⴰ ⵜⵏⴻⵖⵍⴰⴼⵜ ⵙ ⵡⴰⵏⴰⵎⵓ: "ⵙⵙⴻⵍⵄⴰ ⵜⴻⵍⵍⴰ... ⴰⵙⴻⵇⴷⴻⵛ ⵙ ⵍⵎⴻⵏⵜⴻⵇ ⴷ ⵜⴰⴼⵔⴻⵏⵜ-ⵉⴽ". ⴰⵡⴰⵀⵉⵍ-ⴰⴳⵉ ⴰⴷ ⵢⴻⵇⵇⵉⵎ ⴰⵍⴰⵎⵎⴰ ⴷ ⵜⴼⴰⵙⴽⴰ ⵏ ⵍⵄⵉⴷ, ⵉⵙⵡⵉ-ⵙ ⴷ ⴰⵃⴻⵜⵜⴻⵜ ⵎⴳⴰⵍ ⴰⵜⵍⴰⴼ ⵏ ⵓⵜⵛⵉⵜ ⴷ ⵓⵙⴻⵇⴷⴻⵛ ⵙ ⵜⵎⵓⵙⵏⵉ.
ⵜⴰⴳⴳⴰⵔⴰ, ⵎⴰⵙⵙ ⵃⴰⵔⵉⴷⵉ ⵢⴻⵏⵏⴰ-ⴷ ⴱⴻⵍⵍⵉ ⵍⵍⴰⵏ ⵢⵉⵙⴰⵔⴰⴳⴻⵏ ⴷ ⵢⵉⵡⴰⵀⵉⵍⴻⵏ ⴷⴻⴳ ⵢⵉⵙⴰⵍⵍⴻⵏ ⴷ ⵍⴻⵇⴷⵉⵛ ⴷⴻⴳ ⵡⴰⵏⵏⴰⵔ ⵉ ⵡⴰⴽⴽⴻⵏ ⴰⴷ ⵙⵙⴻⴼⵔⵓⵏ ⵉⵎⴷⴰⵏⴻⵏ ⵢⴻⵔⵏⴰ ⴰⴷ ⴷⴷⵓⴽⴽⵍⴻⵏ ⵎⴰⵕⵕⴰ ⵢⵉⵎⴻⵙⴽⴰⵔⴻⵏ ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⴼⵔⴰⵃ ⴷ ⵍⴰⵎⴰⵏ ⴷⴻⴳ ⵡⴰⴳⴳⵓⵔ-ⴰⴳⵉ ⴰⵎⴻⴳⴳⴰⵣ.
ⴰⵔⵏⵓ ⵖⴻⵔ
