ⵢⴻⵜⵜⵡⴰⵎⴹⴻⵍ, ⵙⴻⴳ ⴷⴻⴼⴼⵉⵔ ⵜⵣⴻⵀⵔⵉⵜ ⵏ ⵡⴰⵙⵙⴰ ⵏ ⵍⴻⵜⵏⴰⵢⴻⵏ ⴷⵉ ⵜⴻⵎⵇⴻⴱⵕⴻⵜ ⵜⴰⵎⵎⴰⵙⵜ ⴷⵉ ⴱⵓⵣⵓⵔⴰⵏ (ⴱⴰⵜⵏⴰ), ⵍⵊⴻⵜⵟⴰ ⵏ ⵓⵙⴻⵍⵡⴰⵢ ⴰⵇⴷⵉⵎ ⵏ ⵜⴻⵇⴷⵓⴷⴰ, ⴰⵎⵊⴰⵀⵉⴷ ⵍⵢⴰⵎⵉⵏ ⵣⴻⵔⵡⴰⵍ. ⵍⴻⵇⴷⵉⵛⴰⵜ-ⴰⴳⵉ ⵉⵛⴻⵔⴼⴻⵏ ⵉⵙⴻⵍⵍⴻⵡ-ⴰⵙ ⵓⵙⴻⵍⵡⴰⵢ ⵏ ⵜⴻⵇⴷⵓⴷⴰ, ⴰⵏⴻⵎⵀⴰⵍ ⴰⵎⴰⵜⵓ ⵏ ⵢⵉⵖⴰⵍⵍⴻⵏ ⵏ ⵍⵄⴻⵙⴽⴻⵔ, ⴰⵏⴻⵖⵍⴰⴼ ⵏ ⵓⵙⵜⴰⵏ ⴰⵖⴻⵍⵏⴰⵡ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ.
ⵃⴻⴷⵔⴻⵏ ⴷⴰⵖⴻⵏ ⵢⵉⵎⴰⵙⴰⵢⴻⵏ ⵉⵎⴻⵇⵔⴰⵏⴻⵏ ⵏ ⴷⴷⵓⵍⴰ, ⵡⵓⴷⵎⴰⵡⴻⵏ ⴰⵖⴻⵍⵏⴰⵡⴻⵏ ⴷ ⵢⵉⵄⴳⴰⵍⴻⵏ ⵏ ⵜⵏⴻⵖⵍⴰⴼⵜ, ⴰⴽⴽⴻⴷ ⵢⵉⵄⴳⴰⵍⴻⵏ ⵏ ⵜⵡⴰⵛⵓⵍⵜ ⵏ ⵍⵎⴻⵔⵃⵓⵎ, ⵢⵉⵎⵊⴰⵀⴷⴻⵏ ⴷ ⵢⴰⵜ ⵜⴻⴳⵔⵓⵎⵎⴰ ⵜⴰⵎⴻⵇⵔⴰⵏⵜ ⵏ ⵢⵉⵎⴻⵣⴷⵖⴻⵏ.
ⴷⴻⴳ ⵢⴰⵜ ⵜⵏⴼⴰⵍⵉⵜ ⵏ ⵓⵙⴱⴻⵕ, ⵍⵍⵉⵡⴰ ⵎⴻⴱⵔⵓⴽ ⵙⴰⴱⴻⵄ, ⴰⵏⴻⴷⴷⴱⴰⵍ ⵏ ⵓⵙⵉⵡⴻⵍ ⴷ ⵜⴻⵢⵢⴻⵡⵡⴻⵣⵜ ⵏ ⵓⵏⴻⵎⵀⴰⵍ ⵏ ⵜⵙⴻⴷⴷⴰⵢⵜ ⵏ ⵍⵄⴻⵙⴽⴻⵔ (ANP), ⵉⵛⴽⵓⵏⵜ ⵜⵓⵏⵏⵉⵢⴰ ⵏ ⵍⵎⴻⵔⵃⵓⵎ ⵉ ⵢⴻⴼⴽⴰⵏ ⵜⵓⴷⴻⵔⵜ-ⵉⵙ ⵉ ⵓⵇⴻⴷⴷⵉⵛ ⵏ ⵜⵎⵓⵔⵜ ⴷⴻⴳ ⵢⵉⵡⴻⵏ ⵓⵎⴻⵛⵡⴰⵔ ⵉⵛⵛⵓⵔⴻⵏ ⵙ ⵜⴼⴰⴼⴼⴻⵜ. ⵢⴻⵏⵏⴰ-ⴷ ⵡⴰⴽⴽⴻⵏ ⵢⴻⴼⴼⴻⵖ ⴷⴷⵓⵏⵉⵜ ⴷⴻⴳ ⵡⴰⴳⴳⵓⵔ ⵏ ⵢⵉⵎⴻⵖⵔⴰⵙⴻⵏ, ⵢⴻⵍⵍⴰ ⴷ ⴰⵎⵊⴰⵀⵉⴷ ⵉⴼⴰⵣⴻⵏ ⵉ ⴷ-ⵉⵡⵡⵉⵏ ⴰⵣⴰⵔⵓⴳ.
ⵢⴻⵏⵏⴰ-ⴷ ⵍⵍⵉⵡⴰ ⵎⴻⴱⵔⵓⴽ ⵙⴰⴱⴻⵄ ⵡⴰⴽⴽⴻⵏ ⵍⵎⴻⵔⵃⵓⵎ ⵢⴻⵍⵍⴰ ⴷ ⴰⵏⴻⴷⴷⴱⴰⵍ ⵉⵛⴻⵔⴼⴻⵏ ⴷⵉ ⵍⵄⴻⵙⴽⴻⵔ, ⵢⴻⵡⵡⴻⴹ ⵖⴻⵔ ⵡⴻⵙⵡⵉⵔ ⵏ ⵄⴻⵎⵉⴷ (General) ⴷⴻⴳ 1988. ⵓⵔ ⵢⴻⵃⴱⵉⵙ ⴰⵇⴻⴷⴷⵉⵛ-ⵉⵙ ⴰⵔⵎⵉ ⵉ ⵢⴻⵍⵍⴰ ⴷ ⴰⵏⴻⵖⵍⴰⴼ ⵏ ⵓⵙⵜⴰⵏ, ⵙⵢⵉⵏ ⴷ ⴰⵙⴻⵍⵡⴰⵢ ⵏ ⴷⴷⵓⵍⴰ ⴷ ⵓⵙⴻⵍⵡⴰⵢ ⵏ ⵜⴻⵇⴷⵓⴷⴰ ⴷⴻⴳ ⵢⴰⵜ ⵜⵎⴰⴽⴰ ⵡⴰⵄⵔⴻⵏ, ⴰⵏⴷⴰ ⵢⴻⵙⵙⴻⴼⵔⴻⴷ ⴷⴷⵓⵍⴰ ⵉⵡⴰⴽⴽⴻⵏ ⴰⴷ ⵓⵔ ⵜⴻⵀⵍⵉⴽ.
ⵙ ⵜⴰⵎⴰ-ⵏⵏⵉⴹⴻⵏ, ⴰⵏⴻⵖⵍⴰⴼ ⵏ ⵢⵉⵎⵊⴰⵀⴷⴻⵏ, ⵎⴰⵙⵙ ⵄⴻⴱⴷⴻⵍⵎⴰⵍⴻⴽ ⵜⴰⵛⵔⵉⴼⴻⵜ, ⵢⴻⵙⵙⴻⴽⵏ-ⴷ ⵜⵉⴳⴳⴰⵙ ⵏ ⵍⵎⴻⵔⵃⵓⵎ ⴰⵎ ⵓⵏⴻⴷⴷⴱⴰⵍ ⵉⵛⴻⵔⴼⴻⵏ, ⵉ ⵢⴻⵍⵍⴰⵏ ⴷ ⴰⵣⴰⵎⵓⵍ ⵏ ⵜⵄⴻⵇⵍⴻⵜ ⴷ ⵜⵓⵙⵏⴰ ⵜⴰⵙⴻⵔⵜⴰⵏⵜ ⴷⴻⴳ ⵢⴰⵜ ⵜⵎⴰⴽⴰ ⵏ ⵓⵎⵣⵔⵓⵢ ⵉⵛⵛⵓⵔⴻⵏ ⵙ ⵢⵉⵣⵉⵣⴷⴻⴳⴻⵏ ⵖⴻⴼ ⴷⴷⵓⵍⴰ ⴷ ⵜⴻⵇⴷⵓⴷⴰ. ⵢⴻⵏⵏⴰ-ⴷ ⵡⴰⴽⴽⴻⵏ ⵍⵎⴻⵔⵃⵓⵎ ⴰⴷ ⵢⴻⵇⵇⵉⵎ ⴷ ⴰⴼⵜⵉⵍ ⵉ ⵜⵎⵓⵔⴰ ⵏⵏⵉⴹⴻⵏ.
ⵙⴻⴳ ⴷⴻⴼⴼⵉⵔ ⵍⴻⵇⴷⵉⵛⴰⵜ ⵏ ⵓⵎⴹⴰⵍ, ⴰⵙⴻⵍⵡⴰⵢ ⵏ ⵜⴻⵇⴷⵓⴷⴰ ⵢⴻⴼⴽⴰ ⴰⵛⴻⵏⵢⵓⵍ ⴰⵖⴻⵍⵏⴰⵡ ⵉ ⵢⴻⵙⵙⴻⵍⵃⴰⴼⴻⵏ ⵍⵊⴻⵜⵟⴰ ⵏ ⵍⵎⴻⵔⵃⵓⵎ ⵉ ⵜⵡⴰⵛⵓⵍⵜ-ⵉⵙ.
ⴰⵔⵏⵓ ⵖⴻⵔ
