ⴰⵅⵅⴰⵎ ⵏ ⵢⵉⴷⵍⴻⵙ "ⵉⴱⵏ ⵔⵓⵛⴷ" ⵏ ⵍⵡⵉⵍⴰⵢⴰ ⵏ ⵍⴵⴻⵍⴼⴰ ⴰⴷ ⵉⵙⴰⵍⵉ ⴰⵣⴻⴽⴽⴰ ⵏ ⵍⴻⵜⵏⵉⵢⴻⵏ ⵍⴻⵇⴷⵉⵛⴰⵜ ⵏ ⵜⵉⵥⵔⵉⴳ ⵜⵉⵙ ⵙⵏⴰⵜ ⵏ ⵓⴳⵔⴰⵡ ⴰⵖⴻⵍⵏⴰⵡ ⵏ ⵜⵙⴻⴽⵍⴰ ⵜⴰⵢⴻⵔⴼⴰⵏⵜ ⵜⴰⵣⵣⴰⵢⵔⵉⵜ, ⵙ ⵓⵣⵡⴻⵍ: "ⵜⴰⵎⴰⵛⴰⵀⵓⵜ ⵜⴰⵢⴻⵔⴼⴰⵏⵜ ⵙ ⵡⴰⵍⵍⴰⵍⴻⵏ ⵏ ⵜⴻⵣⵔⴰⵡⵉⵏ ⵏ ⵜⵓⵍⵍⵉⵙⵜ ⵏ ⵜⵓⵔⴰ".
ⵢⴻⵏⵏⴰ-ⴷ ⵓⵎⴰⵙⵡⴰⵢ-ⵏⵏⵉ ⴱⴻⵍⵍⵉ ⵜⴰⴷⵢⴰⵏⵜ-ⴰⴳⵉ ⵜⴰⴷⴻⵍⵙⴰⵏⵜ ⴰⴷ ⵜⵉⵍⵉ ⴷ ⴰⵔⵎⵓⴷ ⴰⵏⴻⴳⴳⴰⵔⵓ ⵏ ⵓⵅⵅⴰⵎ ⵏ ⵢⵉⴷⵍⴻⵙ ⵉ ⵓⵙⴻⴳⴳⴰⵙ 2025. ⴰⴷ ⴷ-ⵛⴰⵔⴽⴻⵏ ⴷⴻⴳ-ⵙ ⵉⵙⴻⵍⵎⴰⴷⴻⵏ ⴷ ⵢⵉⵏⴰⴷⵉⵢⴻⵏ ⵏ ⵜⴻⵙⴷⴰⵡⵉⵜ ⵉⵥⴻⵡⵡⵔⴻⵏ ⴷⴻⴳ ⵜⵙⴻⴽⵍⴰ ⵜⴰⵢⴻⵔⴼⴰⵏⵜ ⴷ ⵡⵉⴷ ⵉⵃⴻⵎⵎⵍⴻⵏ ⴰⵍⵍⵓⵏ-ⴰⴳⵉ ⴰⴷⴻⵍⵙⴰⵏ ⵉ ⵢⴻⵙⵄⴰⵏ ⴰⵣⴰⵍ ⴰⵖⴻⵍⵏⴰⵡ ⵙ ⵜⵓⵎⵏⵉⵜ-ⵉⵙ ⵜⴰⵎⴻⵙⵏⴻⴼⵜ.
ⵍⴻⵇⴷⵉⵛⴰⵜ ⵏ ⵓⴳⵔⴰⵡ-ⴰⴳⵉ ⴰⴷ ⴷ-ⵉⵍⵉⵏ ⵖⴻⴼ ⴽⵔⴰⴷ ⵏ ⵡⵓⵙⵙⴰⵏ ⵉⴽⴰⵎⵍⴻⵏ, ⴰⴷ ⴷ-ⵉⵍⵉⵏ ⵢⵉⵙⴰⵔⴰⴳⴻⵏ ⴷ ⵜⵖⵉⵎⵉⵢⵉⵏ ⵜⵓⵙⵙⵏⴰⵏⵉⵏ ⵉ ⴷ-ⴰⵔⴰ ⵢⴻⵙⵙⴻⴷⵡⵓⵏ ⵉⵙⴻⵍⵎⴰⴷⴻⵏ ⵏ ⵜⴻⵙⴷⴰⵡⵉⵜ ⴷ ⵢⵉⵏⴻⴼⵇⴰⴷⴻⵏ ⵢⴻⵄⵏⴰⵏ ⵜⴰⵎⴰⵛⴰⵀⵓⵜ ⵜⴰⵢⴻⵔⴼⴰⵏⵜ ⵜⴰⵣⵣⴰⵢⵔⵉⵜ.
ⴷⴻⴳ ⵓⵀⵉⵢⵢⴻⵍ ⵏ ⵓⴳⵔⴰⵡ-ⴰⴳⵉ, ⴰⴷ ⴷ-ⵉⵍⵉⵏ ⴷⵉⵖⴻⵏ ⵢⵉⵎⴻⵙⵍⴰⵢⴻⵏ ⵏ ⵜⵙⴻⴽⵍⴰ ⴷ ⵜⵖⵓⵔⵉ ⵏ ⵢⵉⵙⴻⴼⵔⴰ ⵏ ⵍⵎⴻⵍⵃⵓⵏ ⵉ ⴰⵔⴰ ⴷ-ⴼⴽⴻⵏ ⵢⵉⵎⴻⴷⵢⴰⵣⴻⵏ ⵉ ⴷ-ⵢⵓⵙⴰⵏ ⵙⴳ ⵡⴰⵟⴰⵙ ⵏ ⵍⵡⵉⵍⴰⵢⴰⵜ.
ⵉⵡⴰⴽⴽⴻⵏ ⴰⴷ ⵏⵏⴻⵔⵏⵉⵏ ⵡⵉⴷ ⵢⴰⵇⵇⴰⵔⴻⵏ ⵜⴰⵙⴻⴽⵍⴰ ⵜⴰⵢⴻⵔⴼⴰⵏⵜ, ⴰⴷ ⴷ-ⵉⵍⵉⵏⵜ ⵜⵖⵉⵎⵉⵢⵉⵏ ⵏ ⵓⵣⴻⵏⵣⵉ ⵙ ⵓⴱⵓⴷⴷⵓ (vente par dédicace) ⵏ ⵢⴻⴷⵍⵉⵙⴻⵏ ⴷ ⵢⵉⵎⵎⴰⵣⵏⴻⵏ ⵏ ⵢⵉⵎⴻⴷⵢⴰⵣⴻⵏ ⵉⵎⴻⵇⵇⵔⴰⵏⴻⵏ ⵏ ⵍⵎⴻⵍⵃⵓⵏ ⵡⵉⴷ ⵢⴻⵜⵜⵡⴰⵙⵏⴻⵏ ⴷⴻⴳ ⵜⴻⵎⵏⴰⴹⵜ-ⵏⵏⵉ ⴷ ⵜⵎⵓⵔⵜ ⵎⴰⵔⵔⴰ.
ⵍⴻⵇⴷⵉⵛ-ⴰⴳⵉ ⴰⴷⴻⵍⵙⴰⵏ ⴰⴷ ⵢⵉⵍⵉ ⴷ ⵜⴰⴳⵏⵉⵜ ⵉ ⵓⵏⴼⴰⵍ ⵏ ⵜⵉⴽⵜⵉⵡⵉⵏ ⴷ ⵜⵎⵓⵖⵍⵉⵡⵉⵏ ⵖⴻⴼ ⵢⵉⵣⵔⵉ, ⵉⵎⵉⵔⴰ ⴷ ⵢⵉⵎⴰⵍ ⵏ ⵜⵙⴻⴽⵍⴰ ⵜⴰⵢⴻⵔⴼⴰⵏⵜ ⵜⴰⵣⵣⴰⵢⵔⵉⵜ ⵙ ⵡⴰⵍⵍⵓⵏ-ⵉⵙ ⵢⴻⵎⴳⴻⵔⴰⴷⴻⵏ ⴰⵎ ⵜⵎⴰⵛⴰⵀⵓⵜ, ⴰⵙⴻⴼⵔⵓ ⵏ ⵍⵎⴻⵍⵃⵓⵏ ⴷ ⵡⴰⵢⴻⵏ ⵏⵏⵉⴹⴻⵏ ⵏ ⵜⵎⴻⵙⵏⴻⴼⵜ ⵢⴻⵜⵜⵡⴰⵔⵓⵏ ⵏⴻⵖ ⵏ ⵜⵉⵎⵎⵉ.
ⴰⵔⵏⵓ ⵖⴻⵔ
