ⵉⵙⵙⴻⴽⵏⴻⴷ-ⴷ ⵓⵏⴻⵖⵍⴰⴼ ⵏ ⵓⵡⴰⵏⴰⴽ, ⴰⵏⴻⵖⵍⴰⴼ ⵏ ⵜⴻⵎⵙⴰⵍ ⵏ ⴱⴻⵕⵕⴰ ⴷ ⵜⵓⴽⴽⵉⵙⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ, ⵎⴰⵙⵙ ⴰⵃⵎⴻⴷ ⴰⵟⵟⴰⴼ, ⴰⵙⵙ-ⴰ ⵏ ⵍⴻⵜⵏⵉⵢⴻⵏ, ⴰⴳⴻⵔⵔⵓⵊ ⵏ ⵓⵎⴻⵣⵔⵓⵢ ⴰⵎⴻⵣⴷⴰⵢ ⵉ ⵢⴻⵙⴷⵓⴽⴽⵍⴻⵏ ⵍⴻⵣⵣⴰⵢⴻⵔ ⴷ ⵓⵡⴰⵏⴰⴽ ⵏ ⴱⵓⵙⵏⵢⴰ ⴷ ⵀⵉⵔⵣⵉⴳ. ⵉⵙⵔⴻⵚ-ⴷ ⴱⴻⵍⵍⵉ ⵙⵏⴰⵜ ⵏ ⵜⴰⵎⵉⵡⵉⵏ ⴱⵖⴰⵏⵜ ⴰⴷ ⵙⵙⴰⵍⵉⵏⵜ ⵡⴰⵙⵙⴰⵖⴻⵏ ⴳⴰⵔ-ⴰⵙⴻⵏⵜ ⵉ ⵏⴼⴰⵄ ⵏ ⵢⵉⴳⵓⵔⴻⴼ ⵏ ⵙⵏⴰⵜ ⵏ ⵜⵎⵓⵔⴰ.
ⴷⴻⴳ ⵢⵉⵡⴻⵜ ⵏ ⵜⵎⴻⵙⵍⴰⵢⵜ ⵉ ⵢⴻⵅⴷⴻⵎ ⵉ ⵜⵏⴻⵖⵎⴰⵙⵜ ⵙⴻⵍⴷ ⵎⵉ ⵉⵙⴻⵍⵍⴻⵎ ⵉ ⵓⵏⴻⵖⵍⴰⴼ ⵏ ⵜⴻⵎⵙⴰⵍ ⵏ ⴱⴻⵕⵕⴰ ⵏ ⴱⵓⵙⵏⵢⴰ ⴷ ⵀⵉⵔⵣⵉⴳ, ⵎⴰⵙⵙ ⴻⵍⵎⴻⴷⵉⵏ ⴽⵓⵏⴰⴽⵓⵠⵉⵞ, ⵉⵙⵙⴻⴼⵀⴻⵎ-ⴷ ⴰⵟⵟⴰⴼ ⴱⴻⵍⵍⵉ ⵡⴰⵍⴰⵏ ⵜⴰⵔⵔⴰⵢⵉⵏ ⵏ ⵓⵎⵢⴻⵛⵛⴻⵔ ⴷⴻⴳ ⵢⵉⵏⵏⴰⵔⴻⵏ ⵉⵕⴻⵙⵙⴰⵏⴻⵏ ⴰⵎ ⵜⵎⴻⵔⵔⵉ, ⵉⵖⴰⵍⴰⴷⴻⵏ, ⵜⴰⵎⴳⵓⵔⵉ, ⵜⴰⵙⴰⴼⴰⵔⴰⵏⵜ ⴷ ⵜⴼⴻⵔⴽⵉ, ⵔⵏⵉ-ⴷ ⵖⴻⵔ-ⴰⵙⴻⵏ ⵜⵉⵎⵓⵙⵏⵉⵡⵉⵏ ⵏ ⵓⵙⵏⵓⵍⴼⵓ.
ⴰⵏⴻⵖⵍⴰⴼ ⵢⴻⵏⵏⴰ-ⴷ ⵉ ⵓⵏⵉⵍⵖⴰⴼ-ⵉⵙ: "ⴱⵖⵉⵖ ⴰⴷ ⵡⴻⵏ-ⴷ-ⵉⵙⴱⴻⴳⴻⴳⵏⴻⵏ, ⴰ ⵎⴰⵙⵙ ⴰⵏⴻⵖⵍⴰⴼ, ⴰⵣⴰⵔⵓⴳ-ⵏⵏⴻⵖ ⵉⵡⴰⴽⴽⴻⵏ ⴰⴷ ⵏⴽⴻⵎⵎⴻⵍ ⴰⵎⴰⵀⵉⵍ ⵢⵉⴷ-ⵡⴻⵏ ⵉ ⵓⴱⴻⴷⴷⴻⵍ ⵏ ⵜⵎⵓⵖⵍⵉⵡⵉⵏ-ⴰⴳⵉ ⵖⴻⵔ ⵢⵉⵙⴻⵏⴼⴰⵔⴻⵏ ⵏ ⵡⴰⵏⵏⴰⵔ ⵉ ⵏⴼⴰⵄ ⵏ ⵜⵎⵓⵔⴰ-ⵏⵏⴻⵖ".
ⵖⴻⴼ ⵡⴰⵢⴻⵏ ⵢⴻⵄⵏⴰⵏ ⵜⵉⵔⵣⵉ-ⴰⴳⵉ, ⴰⵟⵟⴰⴼ ⵉⵙⵙⴻⴽⵏⴻⴷ ⴱⴻⵍⵍⵉ ⵜⵓⵙⴰ-ⴷ ⴷⴻⴳ ⵍⵡⴻⵇⵜ ⵉ ⴷⴻⴳ ⵙⴼⴻⴳⴳⵉⵔⴻⵏ ⴰⵎⵓⵍⵍⵉ ⵡⵉⵙ 34 ⵏ ⵓⵙⵜⴻⵏⵢⵉ ⵏ ⵍⴻⵣⵣⴰⵢⴻⵔ ⵙ ⵓⵡⴰⵏⴰⴽ ⵏ ⴱⵓⵙⵏⵢⴰ ⴷ ⵀⵉⵔⵣⵉⴳ (24 ⵢⴻⴱⵔⵉⵔ 1992). ⵉⵙⵙⴻⴽⵜⵉ-ⴷ ⴱⴻⵍⵍⵉ ⵍⴻⵣⵣⴰⵢⴻⵔ ⵜⴻⵍⵍⴰ ⴳⴰⵔ ⵜⵎⵓⵔⴰ ⵜⵉⵎⴻⵏⵣⵓⵜⵉⵏ ⵉ ⵉⵇⴻⴱⵍⴻⵏ ⴰⵣⴰⵔⵓⴳ-ⵏⵙⴻⵏ, ⵓⵇⴱⴻⵍ ⴰⴷ ⴷ-ⴽⴽⵛⴻⵏⵜ ⴷⴻⴳ ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.
ⵢⴻⵔⵏⴰ-ⴷ ⵓⵏⴻⵖⵍⴰⴼ ⴱⴻⵍⵍⵉ "ⵜⴰⵎⴻⴽⵜⵉ-ⵏⵏⴻⵖ ⵜⴰⵎⴻⵣⴷⴰⵢⵜ ⵜⴻⵃⵔⴻⵣ ⵜⴰⵍⵍⴻⵍⵜ ⵉ ⴷ-ⴼⴽⴰⵏ ⵢⵉⵎⴷⴰⴽⵍⴻⵏ-ⵏⵏⴻⵖ ⴷⴻⴳ ⴱⵓⵙⵏⵢⴰ ⵉ ⵜⴻⴳⵔⴰⵡⵍⴰ ⵏ ⵓⵙⵍⴻⵍⵍⵉ ⵜⴰⵣⵣⴰⵢⵔⵉⵜ, ⴰⵎ ⵢⴰⴽⴽ ⵢⵉⵖⵔⴻⴼⴰⵏ ⵏ ⵢⵓⴳⵓⵙⵍⴰⵠⵢⴰ ⵏ ⵣⵉⴽ". ⵉⵙⵎⴻⴽⵜⵉ-ⴷ ⴷⴰⵖⴻⵏ ⴰⵎⴻⴷⵢⴰ ⵏ ⵎⴰⵙⵙ ⵎⵉⵍⴰⵏ ⴱⴰⵙⵉⵛ ⵉ ⵢⴻⵙⵙⴻⵍⵡⴰⵢⴻⵏ ⵍⴱⴰⴱⵓ "ⴷⵉⵏⴰ" ⴷⴻⴳ ⵎⴻⵖⵔⴻⵙ 1955 ⵉ ⴷ-ⵢⴻⵡⵡⵉⵏ ⴰⵍⵍⴰⵍⴻⵏ ⵏ ⵢⵉⵎⴻⵏⵖⵉ ⵉ ⵢⵉⵎⴊⴰⵀⴷⴻⵏ ⵍⴻⵣⵣⴰⵢⵔⵉⵢⴻⵏ ⴷⴻⴳ ⵢⵉⵡⴻⵜ ⵏ ⵜⴰⵍⵍⵉⵜ ⵉⵡⴻⵄⵔⴻⵏ ⵏ ⵓⵎⴻⵣⵔⵓⵢ.
ⵉⵡⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵙⵏⴻⴼⵍⵉ ⵏ ⵓⵎⵢⴻⵛⵛⴻⵔ-ⴰⴳⵉ, ⴰⵟⵟⴰⴼ ⵢⴻⴱⴷⴻⵔ-ⴷ ⴽⵔⴰⴷ (3) ⵏ ⵢⴻⵙⵡⵉⵔⴻⵏ:
- ⴰⵙⵡⵉⵔ ⵏ ⵜⵎⵓⵙⵏⵉⵡⵉⵏ: ⴰⵍⴷⴰⵢ ⵏ ⵜⴰⵎⴰⵙⵓⵏⵜ ⵏ ⴱⵓⵙⵏⵢⴰ ⴷⴻⴳ ⵍⴻⵣⵣⴰⵢⴻⵔ ⵙⴻⵍⴷ ⵎⵉ ⵜⴻⵍⴷⴰ ⵍⴻⵣⵣⴰⵢⴻⵔ ⵜⴰⵎⴰⵙⵓⵏⵜ-ⵉⵙ ⴷⴻⴳ ⵙⴰⵔⴰⵢⵉⵠⵓ ⴷⴻⴳ 2022. ⴷⴰⵖⴻⵏ, ⴰⵙⴱⴻⴷⴷⵉ ⵏ ⵜⴻⵙⵇⴰⵎⵓⵜ ⵜⴰⵏⴰⴱⴰⴹⵜ ⵜⴰⵎⴻⵣⴷⴰⵢⵜ ⴷ ⵓⵙⵇⴰⵎⵓ ⵏ ⵢⵉⵎⵙⴻⵜⵎⴰⵔⴻⵏ ⵉⵎⴻⵣⴷⴰⵢⴻⵏ.
- ⴰⵙⵡⵉⵔ ⴰⵙⴰⴷⵓⴼⴰⵏ: ⴰⵙⴻⴳⵔⴻⵣ ⵏ ⵓⵣⴻⵏⵣⵉⵖ ⵏ ⵡⴰⵙⵙⴰⵖⴻⵏ ⵙ ⵢⵉⵎⵜⴰⵡⴰⵏ ⵉⵎⴰⵢⵏⵓⵜⴻⵏ ⴷⴻⴳ ⵢⵉⵏⵏⴰⵔⴻⵏ ⵏ ⵏⴼⴰⵄ.
- ⴰⵙⵡⵉⵔ ⵏ ⵜⴰⵍⵙⴰ: ⴰⵣⴰⵍ ⵏ ⵡⴰⵙⵙⴰⵖⴻⵏ ⴰⴷⴻⵍⵙⴰⵏⴻⵏ, ⴰⵙⴻⵍⵎⴻⴷ ⵓⵏⵉⴳ, ⵜⴻⵎⵎⴻⵔⵔⵉⵜ ⴷ ⵓⵙⴰⵍⴰⵏ, ⴷ ⵜⵉⴽⴽⵏⵉⵡⵜ ⴳⴰⵔ ⵜⵖⵉⵡⴰⵏⵜⵉⵏ ⵏ ⵙⵏⴰⵜ ⵏ ⵜⵎⵓⵔⴰ.
ⴷⴻⴳ ⵓⵏⵏⴰⵔ ⵏ ⵜⴻⵎⵙⴰⵍ ⵏ ⵡⴰⵟⴰⵙ ⵏ ⵜⴰⵎⵉⵡⵉⵏ, ⵙⵉⵏ ⵏ ⵢⵉⵏⴻⵖⵍⴰⴼⴻⵏ ⵇⴻⵔⴷⵛⴻⵏ ⴷⴷⵉⵇ ⴷⴻⴳ ⵓⴳⵎⵓⴹ ⴰⵍⴻⵎⵎⴰⵙ ⴷ ⵢⵉⴱⴻⴷⴷⵉⵍⴻⵏ ⵏ ⵜⵔⴰⴹ ⴷⴻⴳ ⵓⴽⵔⴰⵏⵢⴰ. ⴰⵟⵟⴰⴼ ⵉⵄⴰⵡⴻⴷ ⵉⵙⵔⴻⵚ-ⴷ ⴰⴷⴷⴰⴷ ⵏ ⵍⴻⵣⵣⴰⵢⴻⵔ ⵉ ⴷ-ⵢⴻⵜⵜⴰⵍⵍⴰⵍⴻⵏ ⵜⵉⴷⵓⴽⵍⵉ ⴷ ⵜⵉⵎⵓⵎⴻⵏⵜ ⵏ ⵓⵡⴰⵏⴰⴽ ⵏ ⴱⵓⵙⵏⵢⴰ ⴷ ⵀⵉⵔⵣⵉⴳ.
ⵙⴻⴳ ⵜⴰⵎⴰ-ⵙ, ⵎⴰⵙⵙ ⴽⵓⵏⴰⴽⵓⵠⵉⵞ ⵉⵙⵍⴻⵎ-ⴷ ⵙ ⵡⴰⵙⵙⴰⵖⴻⵏ ⵏ ⵓⵎⴻⵣⵔⵓⵢ ⵉⴶⴻⵀⴷⴻⵏ, ⵢⴻⵏⵏⴰ-ⴷ ⴱⴻⵍⵍⵉ ⵍⴻⵣⵣⴰⵢⴻⵔ ⴷ "ⴰⵎⵛⴻⴷⴷⵉ ⵉⵕⴻⵙⵙⴰⵏ" ⴷⴻⴳ ⵓⴳⴰⴼⴰ ⵏ ⵜⴻⴼⵔⵉⵇⵜ ⵓ ⴷ "ⵜⴰⵡⵡⵓⵔⵜ" ⵉ ⵓⵏⴻⴽⵛⵓⵎ ⵖⴻⵔ ⵉⴳⴻⴷⴻⵣⴻⵏ ⵏ ⵜⴻⴼⵔⵉⵇⵜ. ⵉⵙⵙⴻⴽⵏⴻⴷ ⴱⴻⵍⵍⵉ ⵜⵓⴽⴽⵉⵙⵜ ⵏ ⵡⴻⴼⵀⴰⵎ ⵉ ⵜⵜⵓⵙⵜⴻⵏⵢⴰⵏ ⴰⵙⵙ-ⴰ ⴷⴻⴳ ⵓⵏⵏⴰⵔ ⵏ ⵜⴷⵉⵒⵍⵓⵎⴰⵙⵉⵜ ⴰⴷ ⵜ-ⵄⵉⵡⴻⵏ ⴷⴻⴳ ⵓⵙⵏⴻⴼⵍⵉ ⵏ ⵡⴰⵙⵙⴰⵖⴻⵏ ⴳⴰⵔ ⵙⵏⴰⵜ ⵏ ⵜⵎⵓⵔⴰ.
ⴰⵔⵏⵓ ⵖⴻⵔ
