ⴰⵙⴻⵍⵡⴰⵢ ⵏ ⵜⴳⴷⵓⴷⴰ, ⵎⴰⵙ ⵄⴰⴱⴷⴻⵍⵎⴰⵊⵉⴷ ⵜⴻⴱⴱⵓⵏ, ⵢⴻⵏⵏⴰ-ⴷ ⴱⴻⵍⵍⵉ ⵜⴰⵎⵓⵔⵜ ⵜⴻⵣⵎⴻⵔ ⴰⴷ ⵜⴻⵅⴷⴻⵎ ⵜⴰⵢⵡⴰⵍⵜ ⵜⴰⵎⴰⵢⵏⵓⵜ ⵏ ⵡⴰⴼⵔⴰⴳ ⴰⵎⴻⵜⵜⵉ ⴷⵉ ⵜⴳⴰⵔⴰ ⵏ ⵓⵙⴻⴳⴳⴰⵙ-ⴰ ⵏⴻⵖ ⴷⵉ ⵍⴱⴻⴷⵡⴰ ⵏ ⵓⵙⴻⴳⴳⴰⵙ ⵉ ⴷ-ⵢⴻⵜⵜⴻⴷⴷⵓⵏ, ⴰⵢⴰ ⵙ ⵓⵙⴻⵅⴷⴻⵎ ⵏ ⵜⴻⵔⵇⴻⵎⵏⴻⵜ .
ⴷⴻⴳ ⵓⵎⵙⴰⵡⴰⵍ-ⵉⵙ ⴰⴽⴽⴻⴷ ⵜⵓⵖⵎⵉⵙⵉⵏ ⵜⵉⵏⴰⵎⵓⵔⵉⵏ, ⴰⵙⴻⵍⵡⴰⵢ ⵢⴻⵙⵙⴻⴼⵔⴰ-ⴷ ⴱⴻⵍⵍⵉ ⵜⴰⵔⵇⴻⵎⵏⴻⵜ ⴰⴷ ⵜⴻⵊⵊ ⵜⴰⵎⵓⵔⵜ ⴰⴷ ⵜⴻⴱⴷⵓ ⵜⴰⵙⴻⵔⵜⵉⵜ-ⴰ ⵜⴰⵎⴰⵢⵏⵓⵜ ⴷⵉ 2027. ⴰⵙⴻⵏⴼⴰⵔ-ⴰ ⴰⴷ ⵜ-ⵜⴻⵅⴷⴻⵎ ⵢⵉⵡⴻⵜ ⵜⵙⵇⴰⵎⵓⵜ ⵜⴰⵏⴰⵎⵓⵔⵜ ⴷⴻⴳ ⴰⴷ ⵉⵍⵉⵏ ⵢⵉⴽⴰⴱⴰⴱⴻⵏ ⴷ ⵢⵉⵏⵉⵇⴰⴱⴻⵏ ⵉⵅⴻⴷⴷⵎⴻⵏ.
ⴰⵙⴻⵍⵡⴰⵢ ⵢⴻⵏⵏⴰ-ⴷ ⴱⴻⵍⵍⵉ ⵢⴻⵜⵜⵏⴰⴷⵉ ⴰⴷ ⵢⴻⵡⵡⴻⴹ ⵖⴻⵔ ⵜⵖⴷⴻⵎⵜ ⵜⴰⵎⴻⵜⵜⵉⵜ ⵜⴰⵃⴻⵇⵇⴰⵏⵉⵜ. ⵢⴻⵏⵏⴰ-ⴷ ⴱⴻⵍⵍⵉ ⵓⵔ ⵢⴻⵍⵀⵉ ⴰⵔⴰ ⵎⴰ ⵢⴻⵍⵍⴰ ⴰⴽⴽ ⵍⵖⴰⵛⵉ ⵜⵜⴰⵎⵏⴻⵏ ⵜⴰⵍⴻⵍⵍⵉ ⵏ ⵜⵎⵓⵔⵜ ⴽⵉⴼ-ⴽⵉⴼ, ⵢⴻⵔⵏⴰ ⵙ ⵜⴻⵔⵇⴻⵎⵏⴻⵜ ⴰⴷ ⵏⵉⵥⵉⵔ ⵡⵉⵏ ⵢⴻⵃⵡⴰⵊⴻⵏ ⵡⴰⵢⴷⴻⵔ ⵉⵡⴰⴽⴽⴻⵏ ⴰⴷ ⵢⴰⵡⵉ ⴰⵢⴻⵏ ⵉ ⵢⴻⵙⵙⴻⴼⴽⵏ.
ⵢⴻⵡⵡⵉ-ⴷ ⴰⵡⴰⵍ ⴷⴰⵖⴻⵏ ⵖⴻⴼ ⵓⵙⴻⵅⵚⴻⵔ , ⵢⴻⵏⵏⴰ-ⴷ ⵢⴻⵙⵙⴻⴼⴽ ⴰⴷ ⵏⴻⵃⵔⴻⵣ ⴰⵢⴻⵏ ⵏⴻⵙⵄⴰ. ⵢⴻⴱⴷⴻⵔ-ⴷ ⴰⵙⴻⵅⵚⴻⵔ ⵏ ⵡⴰⵖⵔⵓⵎ (ⵍⵅⵓⴱⵣ), ⵍⴰⴷⵖⴰ ⴷⵉ ⵡⴰⵢⵢⵓⵔ ⵏ ⵕⴻⵎⴹⴰⵏ, ⵢⴻⵏⵏⴰ-ⴷ ⴱⴻⵍⵍⵉ ⴰⵢⴰ ⵢⴻⵜⵜⴻⵅⵚⵉⵔ ⵜⴰⴷⵔⵉⵎⵜ ⵜⴰⵎⴻⵇⵇⵔⴰⵏⵜ ⵏ ⵜⵎⵓⵔⵜ, ⵢⴻⵙⵙⴻⴼⴽ ⴰⴷ ⵢⵉⵍⵉ ⵡⵓⴼⵓ ⵖⴻⵔ ⵓⵎⴷⴰⵏ.
ⴷⵉ ⵜⴳⴰⵔⴰ, ⴰⵙⴻⵍⵡⴰⵢ ⵢⴻⵏⵏⴰ-ⴷ ⴱⴻⵍⵍⵉ ⵍⵣⵣⴰⵢⵔ ⴰⴷ ⵜⴻⵇⵇⵉⵎ ⵜⴻⵜⵜⴰⴽ ⴰⵙⴻⴳⵎⵉ (éducation) ⴷ ⵜⴷⵓⵙⵉ (santé) ⴱⴰⵟⴻⵍ , ⵢⴻⵔⵏⴰ ⵓⵔ ⵢⴻⵜⵜⴻⵅⵅⵉⵔ ⴰⵔⴰ ⵖⴻⴼ ⵓⴱⵔⵉⴷ-ⴰ, ⴰⵛⴽⵓ ⵜⴰⵎⵓⵙⵏⵉ ⴷ ⵜⴻⵣⵎⴻⵔⵜ ⵏ ⵢⵉⵍⵎⴻⵣⵢⴻⵏ ⴷ ⵢⵉⵡⴻⵏ ⵍⵙⴰⵙ ⵏ ⵜⵎⵓⵔⵜ.
ⴰⵔⵏⵓ ⵖⴻⵔ
