ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⴳⴳⴰ ⵓⵏⵖⵍⴰⴼ ⵏ ⵓⵎⴰⵀⵉⵍ, ⵓⵙⵉⵡⴻⴷ ⴷ ⵓⴼⵔⴰⵢ ⴰⵎⴻⵜⵜⵉ, ⵎⴰⵙⵙ ⵄⴻⴱⴷⵓⵍⵃⴰⵇ ⵙⴰⵢⵃⵉ, ⵜⴰⵚⴻⴱⵃⵉⵜ-ⴰⴳⵉ ⴷⴻⴳ ⵡⴰⵙⵉⵔⴰ ⵏ ⵜⵏⴻⵖⵍⴰⴼⵜ, ⵢⵉⵡⴻⵜ ⵏ ⵜⵉⵎⵍⵉⵍⵉⵜ ⵏ ⵓⵎⵢⴻⵍⵍⴻⵍ ⴷ ⵢⵉⵎⴻⵇⵇⵔⴰⵏⴻⵏ ⵏ ⵜⵏⴻⴱⴷⴰⴷⵜ ⵜⴰⵏⴰⵎⵎⴰⵙⵜ. ⵜⵉⵎⵍⵉⵍⵉⵜ-ⴰⴳⵉ ⵜⴻⵔⵣⴰ ⴰⵙⴻⴼⵔⴻⵯ ⵏ ⵍⴻⵇⴷⵉⵛ ⵉ ⴷ-ⵢⴻⵍⵍⴰⵏ ⴳⴰⵔ 22 ⵢⴻⵏⵏⴰⵢⴻⵔ ⴷ 02 ⴼⵓⵔⴰⵔ 2026, ⴷ ⵓⴹⵎⴰⵏ ⵏ ⵓⵙⴻⴷⵎⴻⵔ ⵏ ⵢⵉⵏⴻⴹⴰⴼ ⵉ ⵢⴻⴼⴽⴰ ⵓⵏⵖⵍⴰⴼ ⵢⴰⴽⴰ.
ⴰⴽⴽⴻⵏ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ ⴰⵙⵙ-ⴰ ⵏ ⵍⴰⵔⴱⵄⴰ, ⵎⴰⵙⵙ ⵙⴰⵢⵃⵉ ⵢⴻⵙⵍⴰ ⵖⴻⵔ ⵢⵉⵙⴻⴼⵔⴻⵯⵏ ⵢⴻⵛⵛⵓⵔⴻⵏ ⵖⴻⴼ ⵡⴰⵢⴻⵏ ⵉ ⴷ-ⵢⴻⵜⵜⵓⵅⴷⴻⵎ ⵉ ⵡⴰⴽⴽⴻⵏ ⴰⴷ ⵙⵙⵉⵙⵀⴻⵍⴻⵏ ⵍⴻⵇⴷⵉⵛ ⴰⴳⴷⵓⴷⴰⵏ. ⵢⴻⴼⴽⴰ ⴰⵣⴰⵍ ⵉ ⵢⵉⴱⵔⵉⴷⴻⵏ ⵏ ⵓⵎⴹⴰⵏ (digital) ⵉ ⵢⴻⵜⵜⴰⵊⵊⴰⵏ ⵉⵎⴻⵣⴷⴰⵖ ⴰⴷ ⴼⵔⵓⵏ ⵜⵉⵎⵙⴰⵍ-ⵏⵙⴻⵏ ⵙⴻⴳ ⵡⴰⴳⴳⵓⴳ (ⴷⵉ ⴱⴻⵔⵔⴰ). ⵢⴻⵙⵙⵓⵜⵓⵔ ⴷⴰⵖⴻⵏ ⴰⴷ ⵣⵣⴻⵔⴱⴻⵏ ⴷⴻⴳ ⵓⵙⴻⴽⵛⴻⵎ ⵏ ⵓⵎⴹⴰⵏ ⵉ ⵡⴰⴽⴽⴻⵏ ⴰⴷ ⵜⵊⴻⵀⴻⴷ ⵜⴼⴰⵡⵜ ⴷ ⵜⵏⴻⵊⵊⴰⵃⵜ ⴷⴻⴳ ⵓⵎⴰⵀⵉⵍ.
ⴰⵏⵖⵍⴰⴼ ⵢⴻⵙⵙⴻⵊⴷⴻⴷ ⴱⴻⵍⵍⵉ ⵓⵔ ⵢⴻⵍⵀⴰ ⴰⵔⴰ ⴰⴷ ⵢⵉⵍⵉ ⵓⵄⵔⴰⵇ ⵏ ⵢⵉⴹⵔⵉⵙⴻⵏ ⵏⴻⵖ ⵍⴱⴰⵟⴻⵍ ⵎⴳⴰⵍ ⵉⵣⴻⵔⴼⴰⵏ ⵏ ⵓⵎⴻⵣⴷⴰⵖ. ⵢⴻⴼⴽⴰ ⵜⵉⵏⴻⴹⴰⴼ ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵄⴰⵙⵙ ⴷ ⵓⵙⴻⴳⴳⴻⵎ ⵏ ⴽⵓⵍ ⵓⵄⵟⴻⵍ ⵢⴻⵣⵎⴻⵔ ⴰⴷ ⴷ-ⵢⵉⵍⵉ ⴷⴻⴳ ⵜⵎⴻⵔⵙⴻⵍⵉⵏ ⵢⴻⵇⵇⵏⴻⵏ ⵖⴻⵔ ⵜⵏⴻⵖⵍⴰⴼⵜ-ⵉⵙ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵔⴻⵣⵡⴰ ⵏ ⵢⵉⵎⴷⴰⵏⴻⵏ, ⵎⴰⵙⵙ ⵙⴰⵢⵃⵉ ⵢⴻⵏⵏⴰ-ⴷ ⴱⴻⵍⵍⵉ ⵉⵅⴻⴷⴷⴰⵎⴻⵏ ⴷ ⵏⵉⵜⵏⵉ ⵉ ⵢⴻⵍⵍⴰⵏ ⴷ ⵜⵔⴻⵣⵡⴰ ⵜⵉⴷⴻⵜ ⵏ ⵜⵏⴻⴱⴷⴰⴷⵜ. ⵢⴻⵙⵙⵓⵜⵓⵔ ⴰⴷ ⴼⴽⴻⵏ ⴰⵣⴰⵍ ⵉ ⵜⴻⵡⵔⵉⵇⵉⵏ ⵏ ⵓⵍⵎⵎⵓⴷ ⵉ ⴷ-ⵜⵜⴰⵡⵉⵏ ⵢⵉⵅⴻⴷⴷⴰⵎⴻⵏ ⵎⴱⴰⵄⴻⴷ ⵎⴰ ⴽⵛⴻⵎⴻⵏ ⵖⴻⵔ ⵓⵎⴰⵀⵉⵍ, ⵉ ⵡⴰⴽⴽⴻⵏ ⴰⴷ ⵢⴻⵍⵍⵉ ⵓⵙⴻⴳⴳⴻⵎ ⵏ ⵍⴻⵇⴷⵉⵛ ⴰⴳⴷⵓⴷⴰⵏ ⵢⴻⵔⵏⴰ ⴰⴷ ⵏⴻⴼⴼⴻⵖ ⵙⴻⴳ ⵜⵏⴻⴱⴷⴰⴷⵜ ⵜⴰⵇⴱⵓⵔⵜ ⵖⴻⵔ ⵜⵉⵏ ⵏ ⵜⵓⵔⴰ ⵢⴻⵜⵜⵇⴰⴷⴰⵔⴻⵏ ⵜⴰⵎⵓⵙⵏⵉ.
ⵢⴻⵙⴼⴻⵔⵔⴻⵯ-ⴷ ⴷⴰⵖⴻⵏ ⴱⴻⵍⵍⵉ ⵢⴻⵍⵀⴰ ⴰⴷ ⵢⵉⵍⵉ ⵍⵃⴻⵇⵇ ⴷ ⵜⴼⴰⵡⵜ ⴷⴻⴳ ⵓⵙⴻⴽⵛⴻⵎ ⵏ ⵢⵉⵅⴻⴷⴷⴰⵎⴻⵏ ⵜⵉⵎⴰⵢⵏⵓⵜⵉⵏ, ⵙ ⵓⴼⴽⴰ ⵏ ⵜⴰⵣⵡⴰⵔⴰ ⵉ ⵡⵉⴷ ⵢⴻⵙⵄⴰⵏ ⵜⴰⵎⵓⵙⵏⵉ ⴷ ⵜⵣⵎⴻⵔⵜ ⵉⵊⴻⵀⴷⴻⵏ. ⵢⴻⵙⵙⵓⵜⵓⵔ ⴰⴷ ⵢⵉⵍⵉ ⵓⵙⴻⵇⴷⴻⵛ ⵏ ⵡⴰⵍⴰⵜⴻⵏ ⵏ ⵓⵎⴹⴰⵏ ⵉ ⵓⵙⴻⴳⴳⴻⵎ ⵏ ⵢⵉⵅⴻⴷⴷⴰⵎⴻⵏ ⴷⴻⴳ ⵢⵉⵡⴻⵏ ⵓⵡⴰⵀⵉⵍ ⴰⵙⵜⵔⴰⵜⵉⵊⵉ.
ⵜⴰⴳⴳⴰⵔⴰ, ⴰⵏⵖⵍⴰⴼ ⵢⴻⵙⵙⴻⴽⵜⴰ-ⴷ ⴱⴻⵍⵍⵉ ⵢⴻⵍⵀⴰ ⴰⴷ ⵃⴰⴷⵔⴻⵏ ⴰⴷⵔⵉⵎ ⵏ ⵓⵡⴰⵏⴰⴽ ⵢⴻⵔⵏⴰ ⴰⴷ ⵜ-ⵙⴻⵇⴷⴻⵛⴻⵏ ⵙ ⵍⵎⴻⵏⵜⴻⵇ, ⴱⵍⴰ ⴰⵙⵍⵓⵖⵎⵓ ⵏ ⵢⵉⵣⴻⵔⴼⴰⵏ ⵏ ⵢⵉⵎⴻⵣⴷⴰⵖ ⴷⴻⴳ ⵓⴼⵔⴰⵢ ⴰⵎⴻⵜⵜⵉ. ⵢⴻⵙⵙⵓⵜⵓⵔ ⴰⵎⵢⴻⵍⵍⴻⵍ ⵉⵊⴻⵀⴷⴻⵏ ⴳⴰⵔ ⵎⴰⵕⵕⴰ ⵢⵉⵃⵔⵉⵛⴻⵏ ⵉ ⵡⴰⴽⴽⴻⵏ ⴰⴷ ⵜⵊⴻⵀⴻⴷ ⵜⴻⴼⵍⴻⵙⵜ ⵏ ⵓⵎⴻⵣⴷⴰⵖ ⴷⴻⴳ ⵜⵏⴻⴱⴷⴰⴷⵜ ⵉ ⵢⴻⵍⵍⴰⵏ ⴷⴰⴳⵉ ⵉ ⵍⴻⵇⴷⵉⵛ-ⵉⵙ.
ⴰⵔⵏⵓ ⵖⴻⵔ
