ⵢⴻⵏⵏⴰ ⵓⵎⵃⴰⴷⴷⵉ ⵏ ⵜⵔⴰⴱⴱⵓⵜ ⵜⴰⵖⴻⵍⵏⴰⵡⵜ ⵏ ⴷⵣⴰⵢⴻⵔ ⵏ ⴷⴷⴰⴱⴻⵅ ⵏ ⵓⴹⴰⵔ, ⵔⴰⵢⴰⵏ ⴰⵢⵜ ⵏⵓⵔⵉ, ⴱⴻⵍⵍⵉ ⵢⴻⴱⵖⴰ ⴰ ⵢⴻⴳⴳⴻⵔ ⴰⵃⵔⵉⵛ ⵏ ⵜⵔⴰⴱⴱⵓⵜⵉⵏ ⵏ ⵡⴰⵇⴱⵓⵛ ⵏ ⵜⴼⵔⵉⵇⵜ 2025 ⵙ ⵜⵔⵏⵉ, ⴰⵣⴻⴽⴽⴰ ⴰⵔⴰⵎ, ⴷⴰⵜ ⵖⵉⵏⵢⴰ ⵜⴰⵎⵙⴰⵡⴰⵢⵜ (ⵜⴰⵙⵔⴰⴳⵜ 17:00), ⴷⴻⴳ ⵜⵓⵔⴰⵔⵜ ⵜⴰⵏⴻⴳⴳⴰⵔⵓⵜ ⵏ ⵓⵃⵔⵉⵛ-ⴰ, ⵉ ⵡⴰⴽⴽⴻⵏ ⴰⴷ ⴷ-ⴼⴼⵖⴻⵏ ⵙ ⵜⵓⵎⴰⵏⵜ ⵢⴻⵍⵀⴰⵏ.
ⵢⴻⵏⵏⴰ ⵓⵎⴻⵔⵔⴰⵔ ⵏ "ⵎⴰⵏⵛⴻⵙⵜⴻⵔ ⵙⵉⵜⵉ", ⴷⴻⴳ ⵢⵉⵡⴻⵏ ⵓⵎⵢⵉⵍⵉ ⴷ ⵢⵉⵏⴻⵖⵎⴰⵙⴻⵏ ⴰⵙⵙ ⴰ ⵏ ⵓⵔⴰⵎ, ⵢⴻⵛⴽⴻⵔ ⴰⴷⴷⵓⵢ ⵏ "ⵢⵉⴳⴻⵣⴷⵓⵣⴻⵏ" (ⵍⵅⴻⴹⵔⴰ) ⴰⵔ ⵓⵃⵔⵉⵛ ⵡⵉⵙ ⵙⵉⵏ: "ⵢⴻⵍⵀⴰ ⵉ ⵍⵎⵓⵔⴰⵍ ⴰⵛⴽⵓ ⵏⴻⴹⵎⴻⵏ ⴰⴷⴷⵓⵢ-ⵏⵏⴻⵖ. ⵜⴻⵍⵍⴰ-ⴷ ⵜⵓⵔⴰⵔⵜ ⵜⴰⵏⴻⴳⴳⴰⵔⵓⵜ ⴰⵣⴻⴽⴽⴰ, ⴰⴷ ⵏⴻⴽⵛⴻⵎ ⵉ ⵡⴰⴽⴽⴻⵏ ⴰ ⵏⴻⵔⵏⵓ".
ⵜⴰⵔⴰⴱⴱⵓⵜ ⵜⴰⵖⴻⵍⵏⴰⵡⵜ ⵜⴻⴱⴷⴰ ⴰⴱⵔⵉⴷ-ⵉⵙ ⵙ ⵙⵏⴰⵜ ⵏ ⵜⵔⵏⵉⵡⵉⵏ ⴷⴰⵜ ⵙⵙⵓⴷⴰⵏ (3-0) ⴷ ⴱⵓⵔⴽⵉⵏⴰ ⴼⴰⵙⵓ (1-0), ⵡⴰⵢⵉ ⵢⴻⵙⵙⴻⵊⴻⵍ-ⴰⵙ ⴰⴷ ⵜⵉⵍⵉ ⴷ ⵜⴰⵎⴻⵣⵡⴰⵔⵓⵜ ⴷⴻⴳ ⵜⵔⴰⴱⴱⵓⵜ-ⵏⵏⴻⵙ.
ⵢⴻⵔⵏⴰ ⵢⴻⵏⵏⴰ ⴰⵢⵜ ⵏⵓⵔⵉ: "ⴰⴷ ⵏⴻⴽⴽⴻⵎⵎⴻⵍ ⴰ ⵏⴻⴼⴽ ⵡⴰⵢⴻⵏ ⵏⴻⵣⵎⵉⵔ ⴷⴻⴳ ⵓⵏⵏⴰⵔ ⵉ ⵡⴰⴽⴽⴻⵏ ⴰ ⵏⴻⵙⴼⴻⵔⵔⴻⵃ ⵡⵉⴷ ⴰⵖ-ⵢⴻⵜⵜⴻⴽⴽⵉⵏ. ⵏⴻⵜⵜⵄⴰⵔⴰⴹ ⴰ ⵏⴻⵍⵃⵓ ⵜⵓⵔⴰⵔⵜ ⵙ ⵜⵓⵔⴰⵔⵜ, ⵙ ⵓⵇⴰⴷⴻⵔ ⵏ ⵡⴰⵢⴻⵏ ⴰⵖ-ⴷ-ⵢⴻⵏⵏⴰ ⵓⵎⴻⵙⵙⴻⵖⵏⴻ. ⵜⵓⵔⴰⵔⵜ ⵏ ⵡⴰⵣⴻⴽⴽⴰ (ⴰⵔⴰⵎ) ⵜⴻⵙⵄⴰ ⴰⵣⴰⵍ ⵢⴻⵔⵏⴰ ⵏⴻⴽⵏⵉ ⵏⴻⵍⵍⴰ ⴷⴰ ⵉ ⵡⴰⴽⴽⴻⵏ ⴰ ⵏⴻⵔⵏⵓ ⴷⴻⴳ ⵜⵓⵔⴰⵔⵉⵏ-ⵏⵏⴻⵖ".
ⵖⴻⴼ ⵓⵀⴻⵢⵢⵉ ⵉ ⵜⵓⵔⴰⵔⵜ ⵉ ⴷ-ⵢⴻⵜⵜⴻⴷⴷⵓⵏ, ⵢⴻⵙⴷⴻⴷ ⵓⵎⵃⴰⴷⴷⵉ ⴰⵥⴻⵍⵎⴰⴹ ⵏ ⵎⴰⵏⵛⴻⵙⵜⴻⵔ ⵙⵉⵜⵉ ⴱⴻⵍⵍⵉ ⵍⵛⴻⵖⵍ ⵢⴻⵍⵍⴰ ⵙ ⵍⵊⴻⴷⴷ: "ⵏⴻⵀⴻⵢⵢⴰ ⵙ ⵜⵖⴰⵔⴰ ⵢⴻⵍⵀⴰⵏ ⴰⴽⴽⴻⵏ ⵏⴻⴳⴳⴰ ⴷⴻⴳ ⵙⵏⴰⵜ ⵏ ⵜⵓⵔⴰⵔⵉⵏ ⵉⵄⴻⴷⴷⴰⵏ. ⵖⵉⵏⵢⴰ ⵜⴰⵎⵙⴰⵡⴰⵢⵜ ⴷ ⵜⴰⵔⴰⴱⴱⵓⵜ ⵢⴻⵍⵀⴰⵏ ⵢⴻⵔⵏⴰ ⵜⴻⵙⵄⴰ ⵉⵎⴻⵔⵔⴰⵔⴻⵏ ⵉⴼⴰⵣⴻⵏ, ⵢⴻⵔⵏⴰ ⵉⵙⵡⵉ-ⵏⵏⴻⵖ ⴷ ⵜⵔⵏⵉ ⴷⴻⴳ ⵜⵓⵔⴰⵔⵜ-ⴰ".
ⵖⴻⴼ ⵊⵉⵀⴰ-ⵏⵏⴻⵙ, ⵢⴻⵏⵏⴰ ⴰⵢⵜ ⵏⵓⵔⵉ ⴱⴻⵍⵍⵉ ⵢⴻⵜⵜⵃⵓⵙⵙⵓ ⵙ ⵓⵙⴻⴳⴳⴻⵎ ⵏ ⵍⵎⵓⵙⵜⴰⵡⴰ-ⵢⵉⵙ ⵖⴰⵙ ⵎⴰ ⵓⵔ ⵢⵓⵔⴰⵔ ⴰⵟⴰⵙ ⵓⵙⵙⴰⵏ-ⴰ: "ⵍⵍⵉⵖ ⵢⴻⵍⵀⴰⵏ, ⵖⴰⵙ ⵎⴰ ⵓⵔ ⵓⵔⴰⵔⴻⵖ ⴰⵟⴰⵙ ⵓⵙⵙⴰⵏ-ⴰ ⴰⵛⴽⵓ ⵍⵍⵉⵖ ⵊⴻⵔⵃⴻⵖ. ⵏⴻⵜⵜⵄⴰⵔⴰⴹⴻⵖ ⴰ ⴷ-ⴰⵍⵉⵖ ⵛⵛⵉⵡⴰ ⵛⵛⵉⵡⴰ ⵉ ⵡⴰⴽⴽⴻⵏ ⴰ ⴼⴽⴻⵖ ⵡⴰⵢⴻⵏ ⵏⴻⵣⵎⵉⵔⴻⵖ ⵉ ⵜⵔⴰⴱⴱⵓⵜ ⴰⵛⴽⵓ ⴷ ⵜⴰⵢⵉ ⵉ ⴷ ⵜⴰⵎⴻⵇⵔⴰⵏⵜ".
ⵖⴻⴼ ⵓⵃⴰⴷⴷⵓ (ⴷⴷⵉⴼⴰⵄ), ⵢⴻⵏⵏⴰ ⵓⵎⴻⵔⵔⴰⵔ ⴱⴻⵍⵍⵉ ⵜⴰⵔⴰⴱⴱⵓⵜ ⵜⴻⴱⴷⴻⴷ ⵎⵍⵉⵃ: "ⴷⴻⴳ ⵓⵃⴰⴷⴷⵓ, ⵓⵔ ⵏⴻⵇⴱⵉⵍ ⵓⵍⴰ ⴷ ⵢⵉⵡⴻⵏ ⵏ ⵍⴳⵓⵍ ⴷⴻⴳ ⵙⵏⴰⵜ ⵏ ⵜⵓⵔⴰⵔⵉⵏ, ⵡⴰⵢⵉ ⴷ ⵍⵃⴰⵊⴰ ⵢⴻⵍⵀⴰⵏ ⵉ ⵡⴰⵢⴻⵏ ⵉ ⴷ-ⵢⴻⵜⵜⴻⴷⴷⵓⵏ".
ⴷⴻⴼⴼⵉⵔ ⵜⵓⵔⴰⵔⵜ ⵜⵉⵙ ⵙⵏⴰⵜ, ⴷⵣⴰⵢⴻⵔ ⵜⴻⵍⵍⴰ ⴷ ⵜⴰⵎⴻⵣⵡⴰⵔⵓⵜ ⵙ 6 ⵏ ⵜⵇⵉⴹⵉⵏ, ⴷⴰⵜ ⴱⵓⵔⴽⵉⵏⴰ ⴼⴰⵙⵓ ⴷ ⵙⵙⵓⴷⴰⵏ ⵉ ⵢⴻⵙⵄⴰⵏ 3 ⵏ ⵜⵇⵉⴹⵉⵏ ⵉ ⵢⵉⵡⴻⵏ, ⵎⴰ ⴷ ⵖⵉⵏⵢⴰ ⵜⴰⵎⵙⴰⵡⴰⵢⵜ ⵜⴻⵍⵍⴰ ⴷ ⵜⴰⵏⴻⴳⴳⴰⵔⵓⵜ ⵡⴰⵔ ⵜⴰⵇⵉⴹⵜ.
ⴰⵔⵏⵓ ⵖⴻⵔ
