ⵉⵙⴻⵍⵍⴻⵎ ⵓⵏⴻⵖⵍⴰⴼ ⵏ ⵓⵡⴰⵏⴰⴽ, ⴰⵏⴻⵖⵍⴰⴼ ⵏ ⵜⴻⵎⵙⴰⵍ ⵏ ⴱⴻⵕⵕⴰ ⴷ ⵜⵓⴽⴽⵉⵙⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ ⴷ ⵜⴻⵎⵙⴰⵍ ⵏ ⵜⴻⴼⵔⵉⵇⵜ, ⵎⴰⵙⵙ ⴰⵃⵎⴻⴷ ⴰⵟⵟⴰⴼ, ⵜⴰⵙⴻⴱⴱⵃⵉⵜ ⵏ ⵡⴰⵙⵙ-ⴰ, ⵉ ⵓⵎⵙⴻⴳⵍⴰⵡⴰⵢ ⵓⴼⵔⵉⵏ (envoyé personnel) ⵏ ⵓⵎⴰⵏⴰⵢ ⴰⵎⴰⵜⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ (ONU) ⵉ ⵓⵏⴻⵥⵔⵓⴼ ⵓⵜⵔⵉⵎ, ⵎⴰⵙⵙ ⵙⵜⴰⴼⴼⴰⵏ ⴷⴻ ⵎⵉⵙⵜⵓⵔⴰ, ⵉ ⴷ-ⵢⴻⵔⵣⴰⵏ ⵖⴻⵔ ⵍⴻⵣⵣⴰⵢⴻⵔ ⴷⴻⴳ ⵓⴱⵔⵉⴷ ⵏ ⵢⵉⵡⴻⵜ ⵏ ⵜⵓⵣⵣⵢⴰ ⵉ ⵢⴻⵅⴷⴻⵎ ⴷⴻⴳ ⵜⵎⴻⵏⵏⴰⵟ, ⴰⴽⴽⴻⵏ ⵉ ⴷ-ⵢⵓⵔⴰ ⴷⴻⴳ ⵓⵙⵉⵡⴹ ⵏ ⵜⵏⴻⵀⵍⴰⴼⵜ ⵏ ⵜⴻⵎⵙⴰⵍ ⵏ ⴱⴻⵕⵕⴰ.
ⵉⵙⵙⴻⴼⵀⴻⵎ-ⴷ ⵓⵙⵉⵡⴹ ⴱⴻⵍⵍⵉ ⵜⵉⵎⵍⵉⵍⵉⵜ-ⴰⴳⵉ ⵜⴻⵍⵍⴰ ⴷ ⵜⴰⴳⵏⵉⵜ ⵉ "ⵓⵙⴰⵜⵉⴳ ⵏ ⵍⵎⴻⴶⵀⵓⴷⴰⵜ ⵉ ⵢⴻⴱⵖⴰⵏ ⴰⴷ ⵙⵏⴻⵔⵏⵉⵏ ⴰⴱⵔⵉⴷ ⵏ ⵜⵉⵎⴻⵏⵢⴰⵏⵉⵏ (négociations) ⵖⴻⴼ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ, ⵉⵡⴰⴽⴽⴻⵏ ⴰⴷ ⴷ-ⵢⵉⵍⵉ ⵢⵉⵡⴻⵏ ⵏ ⵓⴼⵔⵓⵔⴻⵢ ⴰⵙⴻⵔⵜⵉ ⵉ ⵇⴻⴱⵍⴻⵏ ⵙⵉⵏ ⵏ ⵢⵉⴽⵓⴱⴰⵔ ⵏ ⵓⵎⴻⵏⵏⵓⵖ, ⵜⴰⴳⴻⵍⴷⴰ ⵏ ⵍⵎⴻⵔⵔⵓⴽ ⴷ ⵊⵉⴱⵀⴰⵜ ⴻⵍ-ⵒⵓⵍⵉⵙⴰⵔⵉⵓ, ⵙ ⵓⵇⴰⴷⴻⵔ ⵏ ⵓⵎⵜⴰⵡⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷ ⵓⵟⵎⴰⵏ ⵏ ⵓⵣⵔⴻⴼ ⵏ ⵓⵖⵔⴻⴼ ⴰⵚⴻⵃⵔⴰⵡⵉ ⴷⴻⴳ ⵓⵙⴻⵏⵏⴻⴷ ⵏ ⵢⵉⵎⴰⵏ-ⵉⵙ
ⴷⴻⴳ ⵓⵏⵏⴰⵔ-ⴰⴳⵉ, ⴰⵏⴻⵖⵍⴰⴼ ⴰⵃⵎⴻⴷ ⴰⵟⵟⴰⴼ ⵉⵄⴰⵡⴻⴷ ⵉⵙⵔⴻⵚ-ⴷ ⵓⴷⴻⴳⴳⴻⵔ ⵏ ⵍⴻⵣⵣⴰⵢⴻⵔ ⵉ ⵍⵎⴻⴶⵀⵓⴷⴰⵜ ⵏ ⵓⵎⴰⵏⴰⵢ ⴰⵎⴰⵜⴰ ⵏ ONU, ⵎⴰⵙⵙ ⴰⵏⵜóⵏⵉⵓ ⴳⵓⵜⴻⵔⵔⴻⵙ, ⴷ ⵓⵎⵙⴻⴳⵍⴰⵡⴰⵢ-ⵉⵙ ⵓⴼⵔⵉⵏ. ⵉⵙⵙⴻⴽⵏⴻⴷ-ⴷ ⴰⵣⴰⵍ ⵏ ⵓⵏⴻⴽⵛⵓⵎ ⴷⴻⴳ ⵜⵉⵎⴻⵏⵢⴰⵏⵉⵏ ⵎⴻⴱⵍⴰ ⵜⵉⵡⵜⵉⵍⵉⵏ ⵏ ⵓⵎⴻⵣⵡⴰⵔⵓ , ⵉⵡⴰⴽⴽⴻⵏ ⴰⴷ ⴷ-ⵢⵉⵍⵉ ⵢⵉⵡⴻⵏ ⵏ ⵓⴼⵔⵓⵔⴻⵢ ⵉⵕⴻⵙⵙⴰⵏ, ⵏⴼⴰⵄⴻⵏ ⵓ ⴷ ⴰⵏⴻⴳⴳⴰⵔⵓ ⵉ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ.
ⴰⵏⴻⵖⵍⴰⴼ ⵏ ⵓⵡⴰⵏⴰⴽ ⵉⵙⵔⴻⵚ ⴷⴰⵖⴻⵏ ⵖⴻⴼ ⵓⵎⴰⵀⵉⵍ ⵉⵕⴻⵙⵙⴰⵏ ⵉ ⵜⴻⵜⵜⴻⴳⴳⴻⵏ ⵜⵎⴰⵣⴰⵏⵜ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵓⴷⴷⴻⵙ ⵏ ⵓⴼⵔⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⵉ ⵡⵓⵔⴰⴽⵓ ⵏ ⵜⵎⴻⵏⵏⴰⵟ. ⵉⵙⵙⴻⴽⵏⴻⴷ ⴱⴻⵍⵍⵉ ⴰⴷⴷⴰⴷ ⵏ ⵍⴻⵣⵣⴰⵢⴻⵔ ⵉⵕⴻⵙ ⵖⴻⴼ ⵓⵇⴰⴷⴻⵔ ⵏ ⵜⵏⴻⵖⵜⴰⵙⵉⵏ ⵏ ⵓⵣⵔⴻⴼ ⴰⴳⵔⴻⵖⵍⴰⵏ ⵢⴻⵄⵏⴰⵏ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ, ⵢⴻⵔⵏⴰ ⵉⵍⴰⵇ ⴰⴷ ⵜⴻⵜⵜⵓⵏⴻⵥⴻⵔ ⴰⵎ ⵜⴻⵎⵙⴰⵍⵜ ⵏ ⵓⵙⵏⴻⴼⵓ ⵏ ⵓⵏⴻⴽⵛⵓⵎ
ⴰⵔⵏⵓ ⵖⴻⵔ
