ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⴱⴱⴻⵔⵔⴻⵃ-ⴷ ⵓⵏⵖⵍⴰⴼ ⵏ ⵓⵙⵍⵎⴻⴷ ⵓⵏⵏⵉⴳ ⴷ ⵓⵏⴰⴷⵉ ⵓⵙⵙⵏⴰⵏ, ⵎⴰⵙⵙ ⴽⴰⵎⴰⵍ ⴱⴻⴷⴷⴰⵔⵉ, ⴰⵙⵙ-ⴰ ⵏ ⵍⵃⴻⴷ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⵖⴻⴼ ⵡⴰⵍⴷⴰⵢ ⵏ ⵓⵊⴻⵔⵔⴻⴷ ⴷⴻⴳ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵡⴰⵀⵉⵍ "ⵍⵎⴻⴷ ⴷⴻⴳ ⵍⵣⵣⴰⵢⴻⵔ" . ⴰⵡⴰⵀⵉⵍ-ⴰⴳⵉ ⵢⴻⵔⵣⴰ ⵢⵉⵏⴻⵍⵎⴰⴷⴻⵏ ⵉ ⴷ-ⵢⴻⵜⵜⴰⵙⴻⵏ ⵙⴻⴳ ⵜⵎⵓⵔⴰ ⵏ ⴱⴻⵔⵔⴰ ⵉ ⵢⴻⴱⵯⴰⵏ ⴰⴷ ⵍⵎⴻⴷⴻⵏ ⴷⴻⴳ ⵜⵎⵓⵔⵜ-ⵏⵏⴻⵖ ⵙ ⵢⵉⵡⴻⵜ ⵏ ⵜⵎⴰⵖⵓⵏⵜ (ⵜⴰⴳⴰⵍⵜ).
ⵎⴰⵙⵙ ⴱⴻⴷⴷⴰⵔⵉ, ⴷⴻⴳ ⵜⵉⵎⵍⵉⵍⵉⵜ ⵜⴰⵖⴻⵍⵏⴰⵡⵜ ⵜⴰⵎⴻⵣⵡⴰⵔⵓⵜ ⵏ ⵢⵉⵏⴻⵍⵎⴰⴷⴻⵏ ⵉⵖⴻⵍⵏⴰⵡⴻⵏ ⴷⴻⴳ ⵜⵏⴻⵎⵎⴻⵍ ⵏ ⵜⵓⵙⵏⵉⵡⵉⵏ ⵏ ⵢⵉⵙⴰⵍⵍⴻⵏ ⴷ ⵜⴻⵢⵡⴰⵍⵜ, ⵢⴻⵏⵏⴰ-ⴷ ⴱⴻⵍⵍⵉ ⵜⴰⵙⵓⵜⵍⵜ-ⴰⴳⵉ ⵜⵉⵙ ⵙⵏⴰⵜ ⴷ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⵡⴰⵍⵉⵏ ⴰⵢⴻⵏ ⵢⴻⵜⵜⵓⵅⴷⴻⵎ ⵙⴻⴳ ⵡⴰⵙⵎⵉ ⵉ ⵢⴻⴱⴷⴰ ⵓⵡⴰⵀⵉⵍ-ⴰⴳⵉ.
ⵢⴻⵙⵙⴻⵊⴷⴻⴷ ⵓⵏⵖⵍⴰⴼ ⴱⴻⵍⵍⵉ ⴰⴱⵔⵉⴷ-ⴰⴳⵉ ⵏ ⵓⵊⴻⵔⵔⴻⴷ ⵢⴻⴱⵏⴰ ⵖⴻⴼ ⵓⵙⵎⴰⵢⵏⵓ ⵏ ⵜⵙⴻⴷⴷⴰⵡⵉⵜ ⴷ ⵓⵙⴻⴳⴳⴻⵎ ⵏ ⵍⴻⵇⴷⵉⵛ-ⵉⵙ. ⴰⴷ ⵢⵉⵍⵉ ⵓⴳⵣⵓⵎ ⵏ ⵜⵎⴰⵖⵓⵏⵉⵏ ⴳⴰⵔ ⵢⵉⵏⴻⵍⵎⴰⴷⴻⵏ ⴷ ⵜⵎⴻⵔⵙⴻⵍⵉⵏ ⵏ ⵜⵙⴻⴷⴷⴰⵡⵉⵜ, ⵉⵎⵉ ⵜⵉⵎⴰⵖⵓⵏⵉⵏ-ⴰⴳⵉ ⴰⴷ ⵙⵙⴻⴽⵏⴻⵏⵜ ⵎⴰⵕⵕⴰ ⵉⵣⴻⵔⴼⴰⵏ ⴷ ⵜⵎⴰⵙⵉⵜ ⵏ ⴽⵓⵍ ⵢⵉⵡⴻⵏ ⵙ ⵜⴼⴰⵡⵜ, ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵍⵎⵎⵓⴷ ⴷ ⵓⵏⴰⴷⵉ ⵓⵙⵙⵏⴰⵏ ⵢⴻⵍⵀⴰⵏ.
ⵢⴻⵔⵏⴰ-ⴷ ⵎⴰⵙⵙ ⴱⴻⴷⴷⴰⵔⵉ ⴱⴻⵍⵍⵉ ⴰⵢⴰ ⴰⴷ ⵢⴻⵊⵊ ⵜⴰⵙⴻⴷⴷⴰⵡⵉⵜ ⵜⴰⵣⵣⴰⵢⵔⵉⵜ ⴰⴷ ⵜⴻⵣⵡⵉⵔ ⴷⴻⴳ ⵓⵎⴰⴹⴰⵍ ⴷⴻⴳ ⵓⵃⵔⵉⵛ ⵏ ⵓⵙⵍⵎⴻⴷ ⴷ ⵓⵏⴰⴷⵉ. ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵢⵉⵏⴻⵍⵎⴰⴷⴻⵏ-ⴰⴳⵉ ⴰⴷ ⵣⴻⵎⵔⴻⵏ ⴰⴷ ⵇⴷⴻⵛⴻⵏ ⴷⴻⴳ ⵜⵎⵓⵔⴰ-ⵏⵙⴻⵏ ⵢⴻⵔⵏⴰ ⴰⴷ ⴰⵡⵢⴻⵏ ⵜⴰⵎⵓⵙⵏⵉ, ⵢⴻⵔⵏⴰ ⴰⴷ ⵍⵍⵉⵏ ⴷ ⵉⵎⵛⴻⵢⵢⵄⴻⵏ (ⵉⵎⵙⴻⵍⵡⴰⵢⴻⵏ) ⵏ ⵍⵣⵣⴰⵢⴻⵔ ⴷⴻⴳ ⵜⵎⵓⵔⴰ-ⵏⵙⴻⵏ ⵜⵉⵢⴻⵎⵎⴰⵜⵉⵏ.
ⵙⴻⴳ ⵍⵊⵉⵀⴰ ⵏⵏⵉⴹⴻⵏ, ⴰⵎⴻⵎⵎⴻⵜⵜⵉⵍ ⵏ ⵜⵏⴻⵖⵍⴰⴼⵜ ⵏ ⵜⵎⵙⴰⵍ ⵏ ⴱⴻⵔⵔⴰ ⴷ ⵜⴼⵔⵉⵇⵜ, ⵎⴰⵙⵙ ⵙⴰⵄⴷⵓⵍⵍⴰⵀ ⴽⴰⵃⴰⵍ, ⵢⴻⵏⵏⴰ-ⴷ ⴱⴻⵍⵍⵉ ⵜⴰⵏⴻⵖⵍⴰⴼⵜ-ⵉⵙ ⵡⴻⵊⵊⴷⴻⵜ ⴰⴷ ⵜⴻⴼⴽ ⵜⴰⵍⵍⴻⵍⵜ ⵉ ⵎⴰⵕⵕⴰ ⵜⵎⴻⵔⵙⴻⵍⵉⵏ ⵜⵉⵖⴻⵍⵏⴰⵡⵉⵏ, ⵍⴰⴷⵯⴰ ⵜⴰⵏⴻⵖⵍⴰⴼⵜ ⵏ ⵓⵙⵍⵎⴻⴷ ⵓⵏⵏⵉⴳ, ⴷⴻⴳ ⵓⵡⴰⵀⵉⵍ-ⴰⴳⵉ ⵏ "ⵍⵎⴻⴷ ⴷⴻⴳ ⵍⵣⵣⴰⵢⴻⵔ". ⵢⴻⵏⵏⴰ-ⴷ ⴱⴻⵍⵍⵉ ⴰⵡⴰⵀⵉⵍ-ⴰⴳⵉ ⵢⴻⵔⵔⵏⴰ-ⴷ ⵖⴻⴼ ⵜⴰⵍⵍⴻⵍⵜ ⵏ ⵡⴻⴷⵔⵉⵎ ⵉ ⵢⴻⵜⵜⴰⴽⴽ ⵓⵡⴰⵏⴰⴽ ⴰⵣⵣⴰⵢⵔⵉ ⵉ ⵢⵉⵏⴻⵍⵎⴰⴷⴻⵏ ⵉⴱⴻⵔⵔⴰⵏⵉⵢⴻⵏ, ⵍⴰⴷⵯⴰ ⵉⴼⵔⵉⵇⵉⵢⴻⵏ ⴷ ⵢⵉⵄⵔⴰⴱⴻⵏ.
ⴷⴻⴳ ⵜⴼⴰⵙⴽⴰ-ⴰⴳⵉ, ⴰⵟⴰⵙ ⵏ ⵢⵉⵏⴻⵍⵎⴰⴷⴻⵏ ⵉⵖⴻⵍⵏⴰⵡⴻⵏ ⵙⵙⵉⵡⵍⴻⵏ-ⴷ ⵖⴻⴼ ⵓⴱⵔⵉⴷ-ⵏⵙⴻⵏ ⴷⴻⴳ ⵜⵙⴻⴷⴷⴰⵡⵉⵜ ⴷ ⵜⴰⵍⵍⴻⵍⵜ ⵉ ⴷ-ⵢⴻⴼⴽⴰ ⵓⵃⵔⵉⵛ ⵏ ⵓⵙⵍⵎⴻⴷ ⵓⵏⵏⵉⴳ, ⵢⴻⵔⵏⴰ ⵛⴽⴻⵔⵏ ⵍⵣⵣⴰⵢⴻⵔ ⵖⴻⴼ ⵓⵙⵡⵉⵔ ⵢⴻⵍⵀⴰⵏ ⵏ ⵓⵍⵎⵎⵓⴷ ⵢⴻⵔⵏⴰ ⵢⴻⵚⴼⴰⵏ ⵉ ⴷ-ⵜⴻⵜⵜⴰⴽⴽ.
ⴰⵔⵏⵓ ⵖⴻⵔ
