ⵉⵙⵙⴻⴽⵏⴻⴷ-ⴷ ⵓⵙⴻⵍⵡⴰⵢ ⵏ ⵓⵙⵇⴰⵎⵓ ⴰⵖⴻⵍⵏⴰⵡ ⵏ ⵓⵖⵔⴻⴼ ⵎⴰⵙⵙ ⴱⵔⴰⵀⵉⵎ ⴱⵓⵓⴳⵀⴰⵍⵉ, ⴰⵙⵙ-ⴰ ⵏ ⵍⵀⴻⴷ, ⴷⴻⴳ ⵓⵣⴻⵏⵣⵉⵖ ⵏ ⵓⵙⴼⴻⴳⴳⴻⵔ ⵏ ⵡⴰⵙⵙ ⵏ ⵜⴻⴼⵔⵉⵇⵜ ⵉ ⴷ-ⵢⴻⵜⵜⴰⵙⴻⵏ ⴷⴻⴳ 25 ⵎⴰⵢⵓ ⵏ ⵢⴰⵍ ⴰⵙⴻⴳⴳⴰⵙ, ⴱⴻⵍⵍⵉ ⵍⴻⵣⵣⴰⵢⴻⵔ ⵜⴻⵟⵟⴻⴼ ⴷⴻⴳ ⵓⴱⵔⵉⴷ-ⵉⵙ ⵉⵕⴻⵙⵙⴰⵏ ⵉ ⵓⴷⴻⴳⴳⴻⵔ ⵏ ⵓⵎⴰⵀⵉⵍ ⴰⴼⵔⵉⴽⴰⵏ ⴰⵎⴻⵣⴷⴰⵢ ⴷ ⵓⵙⴻⴶⵀⴻⴷ ⵏ ⵢⵉⴱⵔⵉⴷⴻⵏ ⵏ ⵜⴷⵓⴽⵍⵉ, ⴰⵙⵏⴻⴼⵍⵉ ⴷ ⵓⵙⵉⴷⵔⴻⵡ ⴷⴻⴳ ⵜⵎⴻⵏⵏⴰⵟ ⵏ ⵜⴻⴼⵔⵉⵇⵜ.
ⴱⵓⵓⴳⵀⴰⵍⵉ ⵢⴻⵏⵏⴰ-ⴷ ⴷⴻⴳ ⵢⵉⵡⴻⵜ ⵏ ⵓⵙⵓⴼⴼⴻⵖ “ⴷⴻⴳ ⵡⴰⵙⵙ ⵏ ⵜⴻⴼⵔⵉⵇⵜ, ⵏⴻⵙⵎⴻⴽⵜⴰⵢ-ⴷ ⵙ ⵓⵇⴰⴷⴻⵔ ⵉⵎⴻⵏⵣⴰ ⵉ ⴷ-ⵉⵙⴱⴻⴷⴷⴻⵏ ⵜⵓⴷⴷⵙⴰ ⵏ ⵜⴻⴼⵔⵉⵇⵜ, ⵡⵉⴷ ⵉ ⵢⵓⵎⵏⴻⵏ ⵙ ⵜⴷⵓⴽⵍⵉ ⵏ ⵜⵎⴻⵏⵏⴰⵟ ⴷ ⵜⴻⵣⵎⴻⵔⵜ ⵏ ⵢⵉⴳⵓⵔⴻⴼ-ⵉⵙ ⵉⵡⴰⴽⴽⴻⵏ ⴰⴷ ⴷ-ⵅⴻⴷⵎⴻⵏ ⵉⵎⴰⵍ-ⵏⵙⴻⵏ. ⵍⴻⵣⵣⴰⵢⴻⵔ, ⵙ ⵜⵎⵓⵖⵍⵉ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⴰⴷ ⵜⴽⴻⵎⵎⴻⵍ ⴷⴻⴳ ⵓⴱⵔⵉⴷ ⵏ ⵓⴷⴻⴳⴳⴻⵔ ⵏ ⵓⵎⴰⵀⵉⵍ ⴰⴼⵔⵉⴽⴰⵏ ⴰⵎⴻⵣⴷⴰⵢ ⴷ ⵓⵕⵓⵚⵓ ⵏ ⵡⴰⵣⴰⵍⴻⵏ ⵏ ⵓⵙⵍⴻⵍⵍⵉ, ⴰⵙⵏⴻⴼⵍⵉ ⴷ ⵓⵙⵉⴷⵔⴻⵡ, ⵉⵡⴰⴽⴽⴻⵏ ⴰⴷ ⵜⴻⵜⵜⵡⴰⴱⵏⵓ ⵜⴻⴼⵔⵉⵇⵜ ⵉⴶⴻⵀⴷⴻⵏ ⵢⴻⵔⵏⴰ ⵜⴻⴷⴷⵓⴽⴽⴻⵍ”.
ⵉⵙⵙⴻⴼⵀⴻⵎ-ⴷ ⴱⵓⵓⴳⵀⴰⵍⵉ ⴱⴻⵍⵍⵉ ⴰⵙⵙ ⵏ ⵜⴻⴼⵔⵉⵇⵜ ⴷ ⵜⴰⵍⵍⵉⵜ ⵏ ⵓⵣⴰⵎⵓⵍ ⵉⵡⴰⴽⴽⴻⵏ ⴰⴷ ⴷ-ⵏⴻⵙⵎⴻⴽⵜⵉ ⵉⵙⴻⴼⵍⴰⵡⴻⵏ (sacrifices) ⵏ ⵓⵎⴻⵣⵔⵓⵢ ⵉ ⵅⴻⴷⵎⴻⵏ ⵢⵉⵎⴻⵏⵣⴰ-ⵏⵏⵉ ⵉ ⵢⵓⵎⵏⴻⵏ ⵙ ⵜⴷⵓⴽⵍⵉ ⵏ ⵜⴻⴼⵔⵉⵇⵜ ⴷ ⵜⴻⵣⵎⴻⵔⵜ ⵏ ⵢⵉⴳⵓⵔⴻⴼ-ⵉⵙ ⵉ ⵓⵡⴻⵣⵣⵉ ⵏ ⵢⵉⵙⴰⵔⴰⵎⴻⵏ ⵏ ⵜⵉⵎⵓⵎⴻⵏⵜ ⴷ ⵓⵙⵏⴻⴼⵍⵉ.
ⴰⵙⴻⵍⵡⴰⵢ ⵏ ⵓⵙⵇⴰⵎⵓ ⴰⵖⴻⵍⵏⴰⵡ ⵏ ⵓⵖⵔⴻⴼ ⵉⵙⵔⴻⵚ-ⴷ ⴱⴻⵍⵍⵉ ⵍⴻⵣⵣⴰⵢⴻⵔ, ⵙ ⵜⵎⵓⵖⵍⵉ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵜⴻⵜⵜⴽⴻⵎⵎⵉⵍ ⴷⴻⴳ ⵓⵎⴰⵀⵉⵍ-ⵉⵙ ⵉⵕⴻⵙⵙⴰⵏ ⴷⴻⴳ ⵓⵏⵏⴰⵔ ⴰⴼⵔⵉⴽⴰⵏ, ⵙ ⵓⴷⴻⴳⴳⴻⵔ ⵏ ⵜⵉⴳⴳⴰⵜⵉⵏ ⵏ ⵜⴻⴳⵔⵓⵎⵎⴰ ⴷ ⵓⵙⴻⴶⵀⴻⴷ ⵏ ⵡⴰⵍⵍⴰⵍⴻⵏ ⵏ ⵓⵎⴹⴰⵎⴰⵏ ⴷ ⵓⵎⵢⴻⵛⵛⴻⵔ ⴳⴰⵔ ⵜⵎⵓⵔⴰ ⵏ ⵜⴻⴼⵔⵉⵇⵜ.
ⵢⴻⵔⵏⴰ-ⴷ ⴱⴻⵍⵍⵉ ⵜⴰⵎⵓⵖⵍⵉ ⵏ ⵍⴻⵣⵣⴰⵢⴻⵔ ⵜⵓⵏⵜⴻⴷ ⴷ ⵓⴱⵔⵉⴷ ⵏ ⵓⵙⵉⴷⵔⴻⵡ ⵏ ⵜⵎⴻⵏⵏⴰⵟ ⵉⵕⴻⵙⵙⴰⵏ ⵖⴻⴼ ⵓⵙⴱⴻⴷⴷⵉ ⵏ ⵢⵉⵡⴻⵜ ⵏ ⵜⴻⴼⵔⵉⵇⵜ ⵉⴶⴻⵀⴷⴻⵏ ⵓ ⵜⴻⴷⴷⵓⴽⴽⴻⵍ, ⵉ ⵉⵣⴻⵎⵔⴻⵏ ⴰⴷ ⵜⵎⴰⴳⵔⴻ ⵢⴰⴽⴽ ⵢⵉⴽⴰⵢⴰⴷⴻⵏ ⵉⴷⴰⵎⵙⴰⵏⴻⵏ, ⵉⵙⴻⵔⵜⵉⵢⴻⵏ ⴷ ⵡⵉⴷ ⵏ ⵜⵎⴰⵏⴻⴳⵜ.
ⴷⴻⴳ ⵜⴰⴳⴳⴰⵔⴰ, ⴱⵓⵓⴳⵀⴰⵍⵉ ⵉⵙⵙⴻⴽⵏⴻⴷ ⴱⴻⵍⵍⵉ ⵍⴻⵣⵣⴰⵢⴻⵔ ⴰⴷ ⴷ-ⵜⴻⵇⵇⵉⵎ ⴷ ⵍⵡⴻⴼⴰ ⵉ ⵜⵜⴻⴶⴶⴰⵜ-ⵉⵙ ⵏ ⵓⵎⴻⵣⵔⵓⵢ ⵖⴻⵔ ⵜⵎⴻⵏⵏⴰⵟ ⵏ ⵜⴻⴼⵔⵉⵇⵜ, ⵓ ⵜⴻⵜⵜⴽⴻⵎⵎⵉⵍ ⴷⴻⴳ ⵓⴷⴻⴳⴳⴻⵔ ⵏ ⵢⵉⵢⴻⵙⴽⵉⵔⴻⵏ ⵎⴻⵕⵕⴰ ⵉ ⵓⵙⴻⴶⵀⴻⴷ ⵏ ⵓⵎⴰⵀⵉⵍ ⴰⴼⵔⵉⴽⴰⵏ ⴰⵎⴻⵣⴷⴰⵢ.
ⴰⵔⵏⵓ ⵖⴻⵔ
